WILLEMSTAD.-Djarason 1 di novèmber próksimo ta tuma lugá findishi di 496.028 bari di fuel oil ku ta den tanki na COT. Ta trata di e fuel oil ku tabata di Caribbean Petroluem Refinery (CPR) pero nan a pèrdè esaki den kaso den korte kontra di Refineria di Kòrsou (RdK) na momentu ku nan a faya ku pago di hür. Deurwaarder a prepará tur kos pa e benta publiko aki por tuma lugá riba e menshoná.

E findishi ta tuma lugá na Klup Oleander na Weg naar Welgelegen i tur esnan interesá por partisipá na e benta aki pagando ku dòler merikano. E produkto enkuestion ta almasená den tanki 9099 na Bullenbaai pa basta luna kaba.

E deurwaarder ta informa ku e bendedó òf e deurwaarder por ninga partisipashon di un partido den kaso ku tin motibu òf sospecha di algu. Tur esnan ku ta partisipá na e findishi mester identifiká nan mes i por eksigí un garantia di banko.

Na final di e benta e kumpradó ta responsabel pa e gastunan di almasenahe i tambe riesgo. Den deliberashon e kumpradó mester regla un tankero pa transporte di e produkto. E kondishonnan di e findishi lo ta na ofisina di deurwaarder Ramazan na Roodeweg 159 na Otrobanda.