WILLEMSTAD.- Hues a kondená e akusado Shannon Lacrus (37) na kastigu di 5 aña pa atrako ku violensia.

Shannon ta keda akusá di a tira atrako riba un pareha turista  dia 2 di aprel 2019 na St. Martha, kaminda a menasá nan ku kuchú, benta e dama abou i logra bai ku nan Kia Picanto  modèl nobo koló shinishi ku tabata pertenesé na e kompania di hür outo Caribe car rental. Den e vehíkulo tabatin vários pertenensia di e víktimanan.

Pa loke ta trata e otro akusashonnan, Shannon ta keda akusá ku dia 23 di mei último el a atraká Cubaweg minimarket i a bai ku vários karchi di Digicel/ Chippie/, bòter di Hennessy, slòfnan di sigaria, mas 670 florin.

Segun e akusashon, e akusado lo a kore drenta e toko kara tapá huntu ku 2 hòmber mas, menasá e chines Liang ku arma di kandela na su kabes i pidié pa dun’é tur sèn den un tono basta agresivo. Despues nan a drenta un Kia Picanto koló shinishi i kore bai.

Riba e mesun dia e ta keda akusá  di a kore drenta “The New ABC minimarket”, di mesun sistema i bou di un manera menasante, a pone arma na kabes di e chines Win i  asina logra bai ku un kaha di sigá ku tabata kontené 1000 florin, mas 2 bòter di  Hennessy i un kadena di oro di 24 karat ku el a ranka for di e chines.

Pa loke ta trata e di 4 akusashon,  Lacrus ta keda akusá pa poseshon di arma di kandela.

Lacrus a bisa ku e ta atmití e dos atrakonan na e tokonan. Pero pa loke ta trata e atrako riba e turistanan si e no tabata aden, apesar ku e tabata kore e vehíkulo ku a keda hòrtá.

Hues a bisa  ku den e prosèsverbal polisnan a rekonosé Lacrus riba imágennan di kámara di e tokonan. Su pareha i su tata tambe a rekonos’é riba e imágennan.

Su ko akusado di fam Comenencia ku a keda kondená kaba, a deklará ku Lacrus tabata esun ku a tira e atrakonan huntu kuné.

Lacrus a bisa ku e tabata traha na hòspital, pero a  haña un aksidente i e no por a traha mas. E tabatin hopi debe di kas, hür i kosnan di den kas ku e mester a paga. Aña pasá el a purba pasa droga pero el a kai será.

Ora el a sali fo’i será, el a kometé e atrakonan. Hues a duna di konosé ku den pasado tambe Lacrus a haña  kondena basta fuerte pa un akto similar.

Pa loke ta trata e atrako riba e turistanan, Lacrus a duna di konosé ku e no a kometé e atrako. Riba e pregunta di hues  unda el a haña e outo ku e tabata kometé e atrakonan kuné, ku a resultá di tabata e mesun outo ku a keda hòrtá, el a bisa ku el a kumpra e vehíkulo a kambio di 30 gram di koka ku ta mas o ménos 3 mil florin. Si e tabata sa ku ta outo hòrtá, e lo no a kumpr’é.

Ora polisnan a bai buska Lacrus na kas, su frei a bèl e  bis’é ku polis a busk’é. E outo un ratu despues a wòrdu pegá na kandela den área di Parasasa. Lacrus a ninga ku e ta esun ku a pega e outo na kandela.

E ko akusado a bisa ku despues ku el a dal e vehíkulo i dun’é un “deuk”, Lacrus a rabia kuné i a bai ku e outo i send’e na kandela.

A haña un arma imitashon di AK, pero a resultá ku tabata un arma di “airsoft” ku Lacrus tabata usa, pa spanta e víktimanan durante atrako.

Fiskal a haña e akusashonnan kompletamente probá i a demandá Lacrus na 9 aña di kastigu, mirando ku e akusado tabata kana den su periodo di prueba.

Hues den su desishon a haña Lacrus responsabel pa 2 atrako mas poseshon di arma. Hues a bisa apesar ku e arma tabata “nep”, tòg e por spanta hende i hinka nan den trouma. Hues a bisa ku e no por akusá Lacrus pa ladronisia di e outo, debí ku e no por proba esaki. Pero ta tene na kuenta si e  manera kon el a yega na e vehíkulo.

Mirando tur esakinan hues ta yega na un kondena di 5 aña.