WILLEMSTAD.- Djasabra 1 yüli 2017 alrededor di 18.40 or, un ofisial di Polis atento a nota tres hòmber den un forma sospechoso na un ATM riba Winston Churchillweg, na un sitio di parker di un negoshi.  Mesora e ofisial aki a pidi asistensia di un unidat speshal di reshèrshe, ku a yega rápidamente na e sitio. Durante di un investigashon  riba e sospechosonan, nan tabatin un kantidat di karchi di banko - sin inskripshon - i plaka kèsh den nan poder. Polis a konfiská tantu e karchinan i e plaka kèsh  pa mas investigashon. Relashoná ku esaki Polis a detené  e tres sospechosonan aki. Ta trata di e hòmbernan:  M.R. di 33 aña di edat, nasé na Servia ku nashonalidat Uandes;  S.G. di 48 aña di edat, nasé na Rumania i  S.S. di 43 aña di edat, nasé na Servia.

A presentá e tres sospechosonan aki, dilanti di un Fiskal ouksiliar ku a ordená nan enkarselamentu pa mas investigashon.   E investigashon den e kaso aki ta kontinuá.

Seguidamente djadumingu  2 yüli 2017 alrededor di 19 or, Sentral di Polis a dirigí unidatnan polisial pa un mashin di ATM na un banko den área di Rio Canario. Na yegada di e promé unidat  na e sitio nan no a topa ku nada partikular. E unidat a sigui ku nan patruya  i riba Gosieweg na un di e ATM nan di e mesun banko e agentenan a mira un hòmber na un outo pará. Tantu e hòmber komo e vehíkulo tabata kuadra ku e deskripshon ku e agentenan a haña for di Sentral. Despues di un investigashon e hòmber D.C.D.S. di 44 aña di edat, nasé na Rumania ku nashonalidat Italiano a keda detené. Mientrastantu un otro unidat ku tambe a dirigí nan mes na e  ATM  na Gosieweg, a mira un otro hòmber  alehando for di e ATM menshoná, ku ta kuadra ku e deskripshon.  E hòmber aki tambe a keda detené. Ta trata di V.D. di 48 aña di edat, nasé na Rumania. Durante nan detenshon a haña e sospechosonan ku diferente karchi di banko i plaka kèsh (dòler) den nan poder. Polis a konfiská tantu e karchinan, e dòlernan i e vehíkulo ku e sospechosonan tabata kore aden pa mas investigashon. E agentenan a bai warda ku e dos sospechosonan. Na momento ku e sospechosonan tabata na warda un di nan e hòmber D.C.D.S. a mira e chèns  pa  hui bai. Mesora polis a start ku un persiguishon tras di e sospechoso, ku a keda detené un biaha mas riba Martiniqueweg. A presentá e dos sospechosonan dilanti di un Fiskal ouksiliar ku a ordená nan enkarselamentu pa mas investigashon.

E investigashon den e kaso aki ta kontinuá.

Un súplika ta bai na abo siudadano, si bo nota un aktividat sospechoso na kualke ATM, mèldu esaki mesora na Polis na e number di telefòn 917.