WILLEMSTAD – Polis ta informá ku awe mardugá alrededor di 03.35, Sentral di Polis a dirigí un patruya den área di Cher Asile, despues di a risibí informashon ku un atrako ta tumando lugá den un kas na Velpstraat. E pareha di edat, habitante di kas a keda maltratá. Diferente otro unidat a dirigí nan mes na e sitio. Na yegada di e unidatnan na e sitio, mesora nan a hasi un búskeda intensivo rònt den e besindario. Na un kas den área di saliña e agentenan a nota moveshonnan sospechoso. Siguiendo ku e investigashon a resultá ku e sospechosonan tabata skonde den e kas. E agentenan a tene un entrada hudisial na e kas i a detené shete sospechoso, sinku hende hòmber i dos hende muhé, ta trata respektivamente di e:

*hòmber R.S.R., 16 aña di edat, nasé na Jamaica;

*dama C.N.O., 28 aña di edat, nasé na Jamaica;

*hòmber J.D.S., 20 aña di edat, nasé na Jamaica;

*hòmber A.R.B., 42 aña di edat, nasé na Jamaica;

*hòmber R.Z.R. 19 aña de edat, nasé na Jamaica;

*hòmber E.J.J., 17 aña di edat, nasé na Kòrsou i

*dama J.G.M.Z. 19, aña di edat nasé na Kòrsou.

Durante di e investigashon na e kas menshoná polis a haña i konfiská algun artíkulo ku ta di importansia pa e investigashon.

Ambulans ku a presentá na e sitio a transportá e víktima maskulino pa poliklínika di SEHOS, pa tratamentu médiko pa e heridanan ku el a risibí durante di e atrako.

A presentá tur e sospechosonan dilanti un fiskal ouksiliar ku a ordená nan enkarselamentu pendiente mas investigashon.

Artikulo nan ku a ser hanja den e kas, skondi tras di un wasmashin

a konfiska varios artikulo pa mas investigashon