5 i 6 aña prisòn pa rumannan Greynstein

WILLEMSTAD.- Awe korte na Zwolle Ulanda a dikta sentensia den kaso di e rumannan Greynstein akusá di labamentu di plaka. E sentensia ku a kai ta di 5 i 6 aña di prisòn.

Dia 6 yüli 2015 outoridatnan hudisial di Kòrsou a drenta den negoshi di famia Greynstein na Punda (Columbusstraat) pa hasi investigashon.
Aki a konfiská 1 mion na plaka kèsh, miéntras a konfiská mas di 100 mion florin na propiedat.
A hasi uso di alrededor di 70 agentenan polisial pa tene entradanan hudisial na diferente direkshon riba nos isla. I na mesun momento e entradanan hudisial a sosodé na Ulanda, i Estádos Unídos, ku a keda hasí dor di agentenan di FBI.

E kaso aki ta basta grandi i ainda ta andando den korte aki na Kòrsou. Na Ulanda sinembargo e kaso a tuma lugá i e sentensia pa Omer i Itzhak Greynstein ta di 5 i 6 aña di prisòn. Nan a laba segun korte miónes di dòler. Ministerio públiko a pidi anteriormente 3 aña pa Itzhak di kual 2 kondishon i pa Omer ministerio públiko a pidi 2 aña prisòn di kual 45 dia no kondishonal. Pero korte ayera a bisa ku mirando gravedat di e akusashonnan e kastigunan mester ta mas. I komo tal tur dos a keda sentensia na kastigunan inkondishonal di 5 i 6 aña. Loke wes a pone énfasis riba dje ku e kastigu mester manda un mensahe kla den komunidat ku nos no tin hustisia di klase aki.

Muchu mas detaye di e kaso aki den EXTRA mañan.

SHARE

LEAVE A REPLY