WILLEMSTAD.-  Doño di un negoshi di outonan di hür, a presentá dilanti korte pa un inkietut ku e tabatin.

Segun e propietario, un kliente di dje a wòrdu pará pa polis durante kontròl di tráfiko, pa kontrolá e papelnan di e vehíkulo.

E kliente a saka e kopia di seguro ku tabata den e vehíkulo, pero e agentenan a eksigí esun original.

Mirando ku e kliente no tabatin esaki, el a  haña un but.

E propietario a splika hues, ku komo doño di su kompania, e ta duna e kliente kopia di e seguro di outo pa kore kuné i ta keda ku e original, pa un tipo di protekshon. El a sigui splika ku e ta hasi esaki, mirando kuantu mal uso sa tin den e tipo di kosnan aki.

Fiskal na su turno a bisa ku lei ta eksigí e seguro original. Normalmente e but lo tabata 500 florin, pero e tin komprenshon pa loke e doño di e outo a trese dilanti. Mirando esaki, e ta demand’é na 50 florin di but, pa no tabatin e seguro original den e vehíkulo, na momento ku polis a para e shofùr. Hues den su desishon a bai kompletamente di akuerdo ku fiskal.