Variante britániko ta mas peligroso i kontagio mas rápido

WILLEMSTAD.- Kòrsou a konosé un rèkert nobo den kasonan ku a test positivo pa Covid riba un dia. Di e tèstnan ku a hasi a yega na 506 kaso positivo pa awe so. Tin 53 hende ku a rekuperá i dos hende mas a fayesé awe. Tin 104 persona hospitalisá relashoná ku Covid, asina dr. Izzy Gerstenbluth a duna di konosé.

Premier Eugene Rhuggenaath meskos ku dr. Gerstenbluth a mustra un ekspreshon di kara di hopi preokupashon na momentu ku nan tabata splika e situashon. Premier e sigui bisa ku hospital ta yen i esnan ku ta traha den hospital tambe a yega nan maksimo, nan ta kansa pero nan ta sigui traha. Hende ta sigui muri anto hende mas hóben ta muriendo. E úniko solushon ta mas hende sigui bakuna pa asina. E variante di Gran Bretaña ta kontagiá mas rápido i e ta mas peligroso. E medidanan ta bai tuma tempu pa nan yuda.

E úniko solushon ta bakunashon! Komo medida a adaptá ‘toque de queda’, esei ta bai kuminsá 7’or di anochi na lugá di 9’or anochi i ta bai dura te 04:30 di mainta. E orario di ‘mantelzorg’ tambe ta bai kambia.

Tin un lista di alrededor di 30 mil kaso di eksonerashon i esaki ta unu ku lo bai revisá, pasobra tin muchu hende riba kaya. Mester minimalisá eksonerashonnan.

Petishon na tur hende pa kanselá ‘staycation’, òf ambiente ku amigu i famia na Bándabou. Awor aki no por permití aglomerashon niun kaminda.

Premier e sigui enfatisá ku e variante britániko ta esun responsabel pa kasi 100% di kontagionan aktual. Gobièrnu so no por, mester hasié hinter komunidat huntu. Rhuggenaath a bisa ku e no tende ku hospital ta ninga hende pasobra ta yen.