WILLEMSTAD - Djamars 29 di desèmber den oranan di atardi pa anochi a repartí 52 prosès verbal relashoná ku medidanan di Covid-19.  A tene diferente roadblock riba entre otro Schottegatweg-Noord, Rotònde Robert Willems (Janwe) i Winston Churchillweg i akinan a parti un kantidat di prosès verbal en konekshon ku toke de keda.

Propietario di un restorant riba De Rouvilleweg a risibí un but i a sera su negoshi, despues ku e dia anterior ya el a wòrdu será i a habri esaki ayera atrobe.

Den oranan di atardi polis a bai na Pier na Marie Pampoen, unda un boto ku registrashon lokal a yega ku mas tantu persona riba dje ku ta permití.  Polis a verbalisá tur e 18 pasaheronan riba e boto i tambe e kapitan en konekshon ku no mantené distansia sosial.