WILLEMSTAD- Un kantidat di 5280 hende a hasi petishon di eksonerashon pa e periodo di “lockdown” ku a kuminsá djárason último na Kòrsou banda di esaki gobièrnu ta konsiderando pa habri un “call center” pa por atendé tur e yamadanan ku pregunta di siudadanonan. Esaki ta loke ku promé minister sr. Eugene Rhuggenaath a duna di konosé.
Promé minister a lamentá ku kasonan positivo di Coronavirus ta sigui subi tur dia. El a indiká ku algun siman pasá a anunsiá ku e variante di Inglatera ta na Kòrsou i si no kuida e kantidat di kasonan lo a sigui subi, i esei por mira awor. Ta na gobièrnu pa manehá e subida di kasonan. Pa esnan ku ta sinti pániko, promé minister a pidi tur hende pa keda trankil. Ta for di aña pasá tur organisashon i e tim ku ta manehá krísis ta trahando pa kombatí e vírus. P’esei nan ta reuní diferente biaha pa tuma desishonnan.
Manera ariba indiká di e kantidat di 5280 petishon di eksonerashon, gobièrnu ya a prosesá 5163 pa keda repartí. Tin vários instansia manera kuerpo polisial, brantwer, wardakosta, VKC, empleadonan di hospital, interpol, ekipo di koperashon di investigashon kriminal, defensa militar no mester di eksonerashon, pasobra e trahadónan por usa nan “badge”, i mester tin nan skema di trabou ora ta riba kaya pa bai trabou. Igualmente e ta konta pa e hendenan ku ta enkargá ku kuido na kas. Tambe si mester bai dòkter òf botika pa kaso di emergensia no mester di eksonerashon.
Tambe promé minister a hasi yamada na tur agrikultor, piskadó i kriadó di bestia ku lo tin eksonerashon pa pasa na bentana di AVB pa yudansa pa hasi e petishon. E orario ta di djaluna pa djabièrnè di 8’or di mainta pa 12’or di mèrdia. Plachi di dia ta keda konta.
Gobièrnu ta trahando pa habri un “call center” pa atendé tur e yamadanan di pregunta di tur hende.
Pa loke ta trata hospital, promé minister Rhuggenaath a bisa mas aleu ku kos ta bayendo den situashon krítiko. Komo gobièrnu ta keda monitòr e kuido médiko i di hospital. CMC su eskalashon di kapasidat ta den fase.
Finalmente promé minister a hasi yamada na kompanianan pa sera nan porta i traha mas tantu for di kas i evitá hopi hende na trabou. Ya kaba den seno di gobièrnu, minister di BPD, sr. Konket a manda karta pa servisionan i gobièrnu pa por traha mas tantu na kas, i kaminda tin “bali” pa sera esakinan i laga tur hende traha for di kas.
Tambe promé minister a pidi esnan ku no ta kere den COVID-19 pa no sigui plama e notisia ku ta un teoria di kòmplòt esaki ta.