Tin kámara na tur ‘community mailbox’ pues lo hasi denunsia na polis

WILLEMSTAD.-Vários kas den e barionan Charo i Mundu Nobo ta keda afektá pa e echo ku muchanan baldadi òf adultonan ku mente maligno a kousa destrukshon grandi na ‘community mailbox’ riba Piscaderaweg, na altura di misa di Coromoto, pega ku GGD. Gerensia di CPost a konfirmá esaki pa EXTRA indikando ku e kaso a tuma lugá den e anochi di 30 pa 31 di desèmber tras di lomba. E daño ta konsiderabel loke ta nifiká ku mester kambia e pedestal kompletu. Ya kaba CPost ta hasiendo e trámitenan i pa otro siman ta spera di por pone un pedestal nobo na e sitio, asina direktor Jervhes Josephia a deklará.

Manera EXTRA a informá algun ratu promé, a kousa destrukshon grandi na un ‘community mailbox’ riba e plenchi dilanti misa di Coromoto. Tin alrededor di 20 ‘community mailbox’ instala na Kòrsou i e uniko ku a sufri destrukshon den e temporada di fin di aña ta esun na Piscaderaweg. Tur kos ta mustra ku ta den kuadro di kambio di aña kaminda tin vürwèrk disponibel ku a usa dònderbos pa rementá un pedestal di e forma aki. E direktor a splika mas aleu ku dia 31 di desèmber un tim di CPost a bai na e sitio i saka kartanan ku a keda den sobra lachinan kibra. Un total di 54 adrès den e barionan menshoná ta keda afektá ku e akto baldadi aki.

CPost ya kaba ta hasiendo e trámitenan pa remplasá e pedestal kibra. Ta bai kambia e slòtnan di manera ku e abitantenan afektá no mester bai pasa den e molèster pa bai buska yabi nobo etc. Tur esaki ta tuma lugá miéntras ku ta tuma e imágennan di kámara pa despues hasi denunsia na polis. Sr. Josephia a enfatisá ku tin kámara na tur ‘community mailbox’ na Kòrsou, pues ta bon pa mayornan por konsientisá nan yunan ku e destrukshon ku nan kousa na propiedat di komunidat tin konsekuensia pa nan mes. Lo ta bon pa den barionan bisiñanan yuda otro tira bista i yuda konsientisá muchanan den bario pa no destruí propiedat di komunidat i di otro hende. Esun ku kousa destrukshon por hasi daño na su mes, na su mayornan i otronan.

Rementá brivenbùs ku vürwèrk, spesialmente usando dònderbos, ta algu ku dékadanan pasa ta konosí kaba. Den pasado nos a konosé situashon kaminda muchanan baldadi ta rementá brivenbùs na kas di hendenan den bario. Den mayoria kaso ta muchanan/amigunan di bario mes ta hasi e mal wega ei ku otro. Den e kaso aki a rementá un kashi ku ta warda pòst di hinter un bario. Pa otro siman e barionan menshoná lo tin un pedestal nobo instalá pa sirbi e komunidat.