WILLEMSTAD.- Abogado general Angela, a bolbe pidi 54 luna di prizòn pa Leonard Vrutaal (28), ku a keda kondená na mesun kastigu den korte di promé instansia, pa un kaso di atrako. Fo’i e promé dia di su detenshon, Vrutaal a para riba ku e no tin nada di aber ku e kaso. Ayera atrobe meskos ku den korte di apelashon, el a bisa di ta bastante rabiá paso e ta será inosentemente.

Vrutaal huntu ku su 2 ko-akusadonan, a keda akusá di a kometé un atrako na Lanthùis Klein Santa Martha dia 1 di mart 2019.  E ta e úniko ku a apelá e sentensia.

Riba e dia enkuestion, algun hòmber a presentá na e lanthùis i menasá e bewaker. Nan a kue su telefòn, “flashlight”, tas i su pòtmòni ku tabatin 6 florin  i 1000 florin aden. Nan a bai ku vários bleki limonada i bòternan di biña. Tambe nan a bai ku paña, kaha di hèrmènt, mashin di bòr i otro materialnan di reparashon.

E bewaker a deklará, ku el a keda sorprendé pa 6 hòmber ku a kore yega kara tapá, uzando violensia i menas’é ku un kuchú.

Bou di menasa di kuchú, nan a pon’e drumi plat abou, mara su mannan pa listr’e.

Nan a kana listra rònt e lanthùis, yena algun kos den un tas koló blou i bai kuné. Ora ku nan a bai, el a haña chèns di bèl e doño, pa kont’é kiko a pasa.

Despues di 2 minüt ku polis a  yega serka e bewaker, nan a haña un “melding” anónimo, ku e hòmbernan tabata partiendo e botin, patras di Soto minimarket.

Polis a bai na e sitio i a mira par di hende yòn kore bai, ora nan a nota nan presensia. E agentenan a bisa di a rekonosé e otro ko-akusadonan i tambe Vrutaal na su rasta. Polis a haña diferente mashin di bòr, limonada friu, paña i e tas koló blou di e bewaker i tambe vários bòter di alkohòl. Despues polis a haña otro informashon, ku ta 3 hòmber a kometé e atrako inkluso Vrutaal.

Vrutaal a bisa e tribunal di korte di apelashon ayera ku e ta hopi rabiá ku e otro ko-akusadonan, pasó nan ta gaña riba dje pa skapa otro hende.

Segun Vrutaal, e no tabata tei mes i e nòmbernan ku mester a keda nombrá, e otro gainan, no a hasi esaki.

Un di e ko-akusadonan a deklará ku un ratu promé ku polis a presentá, Vrutaal i un otro hòmber a kore yega ku algun kos i a konta, ku nan a kaba di kometé atrako.

E hòmbernan lo a mustra loke nan a hòrta. El a bisa ku nan a wak un tas ku kosnan hòrtá, despues el a mira kon un amigu di nan ta kumpra e mashin di bòr.

Segun Vrutaal, ta su ko-akusado di fam Lodovica a kometé e atrako, pasó el a bin konta nan i a duna un primu di dje blekinan di limonada, ku nan a hòrta.

Hues dado momento, a puntra Vrutaal si nan ta yam’e “kòrá”. Vrutaal a kontestá ku nan ta yam’e entre otro “Leo”,pero no kòrá”.

Hues a remarká ku  den un prosèsverbal, polis a skibi di a rekonosé un di e sospechosonan ku tabatin rasta komo “kòrá”. Pero hues a bisa ku esei ta zona straño, pa motibu ku Vrutaal ta kolo skur. Vrutaal na su turno a bisa ku den Soto tin un rasta ku si nan ta yama “kòrá”, pero e lo no bai divulgá su nòmber.

Abogado general, durante su rekisitorio, a haña tur e akusashonnan probá abase di e deklarashonnan, e kosnan hòrtá ku nan a haña i tambe e prosèsverbal ku polis a rekonosé e akusadonan. Mirando esakinan abogado general ta pidi e tribunal, pa konfirmá e sentensia di korte di promé instansia, ku ta 54 luna pa Vrutaal.