WILLEMSTAD,- Yvonne Wolthuis-Olf di e organisashon Hende-i-Medio-Ambiente (HiMA) ta lamentá ku e kaso ku su organisashon a kuminsá kontra gobièrnu di Kòrsou a ser posponé. Awor lo tin sentensia riba 15 di yanüari 2024. Asina korte a disidí fin di novèmber.
Manera ta konosí HiMA for di 2019 a kuminsá pidi atenshon na gobièrnu di Kòrsou pa e echo ku no tur hende riba nos isla tin akseso na awa limpi. Na un dado momento HiMA a kuminsá un kaso pa fòrsa gobièrnu pa instalá un maneho ku ta sòru ku tur hende na Kòrsou tin akseso na awa limpi. Banda di esei segun HiMA gobièrnu mester ta mas aktivo pa evitá ku mas hende lo wòrdu deskonektá.
Te ainda wes no a duna un veredikto. Bou di preshon di korte, fundashon HiMA den e último añanan a palabrá diferente bia ku ministerio di Desaroyo Sosial, Labor i Bienestar (SOAW).
Manera ta konosí den luna di desèmber aña pasá minister Ruthmilda Larmonie-Cecilia di SOAW a lansa un link ku yama awa.soaw.info pa esnan ku no tin awa por keda rekonektá atrobe riba e ret di awa di Aqualectra. Tambe tin un ‘preventieafspraak’ (akuerdo di prevenshon) ku Aqualectra. Ku ta nifiká ku Aqualectra lo informá ministerio promé ku nan ta deskonektá kasnan. Aqualectra tambe ta duna informashon tokante kliente ku ta kore riesgo pa wòrdu deskonektá for di awa i koriente. Banda di esaki Aqualectra a kambia su reglanan, ku ta nifiká ku nan ta tene mas kuenta ku situashon di hende ku tin problema ku pago.
Segun ministerio di SOAW por konkluí ku tin hopi mas atenshon pa e tópiko di awa limpi pa tur hende, kompará ku dos, tres aña pasa. Fundashon HiMA ta di opinion ku tòg ta bon pa korte ta trata e kaso. Esaki ta garantisá ku den futuro gobièrnu lo sigui duna atenshon na un maneho pa evitá ku hende ta keda sin akseso na awa limpi.

Segun Wolthuis-Olf korte na Kòrsou a posponé e kaso debí ku nan ta spera e kaso di apelashon di un kaso legal similar na Hulanda, ku a tuma lugá 11 di desèmber último.
E kaso aki a ser inisiá pa organisashon Defence for Children i Nederlands Juristen Comité voor de Mensenrechten (NJCM).
Dia 6 di aprel 2022, e korte na Den Haag a duna su sentensia riba e kaso di awa na Hulanda. Segun korte no ta ilegal si famianan ku mucha nan ret ta ser kòrtá di e suministro di awa ora nan mayornan no por paga e kuenta di awa.
Defence for Children i NJCM no ta akseptá e sentensia aki i, pa esei, nan a hasi apelashon. Esaki a tuma lugá 11 di desèmber. Sentensia ta sigui generalmente algun siman despues di e seshon. Wolthuis-Olf ta splika ku na Kòrsou nan ke warda pa esaki.