WILLEMSTAD.- Kòrsou a keda afektá di un manera inmenso pa motibu di e Corona virus. Mester a sera skolnan, turistanan mester a bandoná Kòrsou inmediatamente, kompanianan mester a sera nan portanan i empleadonan mester a bai traha for di kas òf a pèrdè trabou.

Stichting Help Curaçao a sinti su mes yamá pa duna yudansa, i na promé instansia den koperashon ku Ministerio di SOAW (trahando ku señora Zulaijka Pinedo-Brandao den su kalidat di empleado di kabinèt) a hasi posibel pa traha pakete di kuminda pa entregá na esnan den nesesidat.

Na aprel e fundashon a keda aserká dor di Kunuku Aqua Resort i Europe West Indies Trading Company (EWT) pa traha konhuntamente riba un proyekto pa entregá kuminda kayente na esnan den nesesidat ku ta forma parti di nos komunidat. A kuminsá ku e proyekto aki dia 7 di mei último ku a dura 6 siman, e gastunan e keda kargá pa Kunuku Aqua Resort i EWT. Wit Gele Kruis i Stichting Thuiszorg Banda Bou i 2 otro instansia manera We Believe Kids Foundation a keda aserká pa partisipá na e proyekto. E gruponan di enfoke tabata personanan ku ta dependé di yudansa di otro na kas i nan miembro(nan) di famia ku ta biba ku nan den kas, muchanan ku ta dependé di un “opvang” pa risibí kuminda kayente i personanan ku pa un motibu òf otro no ta risibí un penshun kompleto. Dicho gruponan di enfoke, en total mas o ménos 600, a risibí durante 6 siman kuminda kayente diariamente.

Despues di e periodo di 6 siman Stichting Help Curaçao a sera un kombenio ku Krus Kòra Kòrsou, ku tabata dispuesto na kontinuá ku e proyekto te fin di sèptèmber próksimo. EWT i Kunuku Aqua Resort a keda partner den e totalidat. Kunuku ta prepará e kumindanan, EWT ta sòru pa sigui entrega e produktonan i ta sòru pa un parti di e transporte pa un di e sentronan di distribushon. E papel di kordiná Stichting Help Curaçao a tuma esei na su enkargo konhuntamente ku ministerio di SOAW.

Miéntras tantu a yega na 58.000 kuminda despues di e lunanan di distribushon. 7 Dia pa siman ta entregá kuminda kayente na Bándabou i Bándariba na esnan ku tin mas mester di dje. Pa e preparashon i distribushon di e kumindanan aki tin un papel masha grandi pa e kòki di Kunuku Aqua Resort i su tim, EWT, AMC Cargo (A&A transport) i tur e boluntarionan tremendo. E boluntarionan ta pone nan mes diariamente disponibel pa kore rònt i hasi entrega di e kumindanan òf partinan na e lugánan di distribushon. Stichting Help Curaçao ta sumamente orguyoso ku di e manera aki por aportá na bienestar di e grupo di hende den nesesidat, na esnan ku tin tantu mester di dje.

E Fundashon a organisá djadumingu dia 16 di ougùstùs un enkuentro ameno ku e partnernan i boluntarionan ku ta yuda karga e proyekto di kuminda. E intenshon di e enkuentro tabata pa duna elogio na e boluntarionan i pa konhuntamente selebrá ku a repartí 58.000 kuminda kayente. Durante e enkuentro aki diferente persona a dirigí palabra na e boluntarionan pa gradisí nan pa e bon trabou ku nan a desplegá manera entre otro minister di SOAW señor Hensley Koeiman. Aparte di minister Koeiman tambe a hiba palabra Denice Bezemer-Hoyer, presidente di Stichting Help Curaçao, Henk Scherpenhuysen na nòmber di Kunuku Aqua Resort i Robbin Martina representando EWT. E Fundashon a hasi uzo di e oportunidat pa gradisí EWT, Kunuku Aqua Resort, Krus Kòra Kòrsou, Ministerio di SOAW, señora Zulaijka Pinedo-Brandao trahadó di SOAW enkargá ku e proyekto, Wit Gele Kruis, Stichting Thuiszorg Banda Bou, señora Milusca (Mimi) Griejaloe, Raichel Sintjacoba, señor Anthony Selassa, AMC Cargo (A&A Transport) i tur boluntario di Bándabou i Bándariba.

Durante e mèrdia aki e fundashon a risibí na man di señor Sjoerd de Groot, veterinario di Dierenartsenpraktijk Alablanca, 10 jug grandi pa transportá e kumindanan den dje. E gratitut ta enorme pa esaki, komo ku nan ta di gran nesesidat.