ABVO ta kontentu pa e bon trabou di direktor i Ministerio

WILLEMSTAD.- Trahadónan di fundashon Brasami ta risibí un indeksashon di salario di 6 porshento ku forsa retroaktivo. “Porfin tin un lus positivo na final di e tùnel pa e trahadónan”, miembro di direktiva di ABVO, Raymond Margaritha ta bisa den deklarashon pa EXTRA.

ABVO ta kontentu ku despues di un lucha di hopi aña i malkontentu bou di e personal ku direktornan den pasado, ku e aktual direktor sra. Constancia-Klaber a demostrá empatia i for di prinsipio pa duna e trahadónan di Brasami speransa riba adelanto, Margaritha ta bisa. Na 2023 gobièrnu a paga indeksashon di salario atrobe i kontrato kolektivo di sierto fundashon ta stipulá ku den kaso ku gobièrnu paga indeksashon salarial ku e fundashon tambe mester purba pa hasi esaki.

E situashon finansiero di hopi fundashon sinembargo ta fèrfelu pasobra ta for di 2018 a kuminsá kòrta den nan supsidio. “Pero for di komienso di e aña aki mi persona huntu ku sra. Lourens i sr. Manuela a reuní ku e direktor di Brasami i su gerensia kaminda a bisa ku apesar ku no tin e forsa finansiero pa paga indeksashonnan ku forsa retroaktivo te añanan atras, pa wak kiko por hasi a base di e situashon aktual.”

Ta den e kuadro aki ku gerensia di Brasami a bai hasi kalkulashonnan for di 2015 bin ariba i Margaritha ta bisa ku a logra di paga un indeksashon di 6 porshento ku forsa retroaktivo te yanüari di e aña aki. “ABVO ta satisfecho ku loke gerensia di Brasami huntu ku Ministerio di Salubridat Públiko, Medio Ambiente i Naturalesa (GMN) a logra.”

Margaritha ta mustra direktor i gerensia di Brasami tabatin e sabiduria pa motivá nan punto di bista i konvensé gobièrnu ku no por sigui tene e trahadónan atras den un situashon di oumento di inflashon bárbaro manera a pasa den dje último añanan. “ABVO ta kontentu ku Ministerio di GMN tambe a duna su granito pa logra e bunita resultado aki pa trahadónan.”

Mas aleu Margaritha ta bisa ku e sindikato por a komprondé ku ta trahando pa otro aña introdusí un struktura salarial nobo loke ta duna mas speransa atrobe. “Nos ta sumamente kontentu i ta konvensí ku tin kapasidat i boluntat na Brasami pa yuda trahadónan pa bai dilanti.”

E miembro di direktiva di ABVO ta indiká mas aleu ku e ta konsiente ku gastu di personal ta haltu, pero no por sigui kòrta tampoko den e gastunan aki ni maske ku Hulanda ta pone preshon pa gobièrnu baha su gastunan, pasobra inflashon ta haltu i forsa di kompra di e trahadónan a bai hopi atras.

“Fundashon Brasami a hasi un trabou grandi pa motivá dikon mester di mas fondo i tur fundashon mester ta konsiente ku nan tambe mester motivá dikon nan mester bin na remarke pa mas supsidio. Direktiva i gerensia di e fundashonnan mester demostrá di tin e sabiduria, kompetensia i boluntat pa hiba e fundashon dilanti.”

Finalmente Margaritha ta elogiá e direktor di Brasami pa a trese konfiansa bèk i ta spera ku ta keda hasi e trabou den bon esfera pa adelanto di e trahadónan.

Foto:

...Raymond Margaritha...