WILLEMSTAD. - Konforme sifranan di wikènt tras di lomba Kòrsou a konosé un kantidat di 1.715 kaso positivo despues di a tèst 6.726 persona. Di e kantidat di kontagionan registrá den wikènt a resultá ku 140 kaso positivo, tabata kaso importá.

Na mes momentu mester indiká ku 476 persona a sali for di isolashon, loke ta trese e kasonan aktivo na 8.801.

Pa loke ta trata hospitalisashon, tin 26 persona hospitalisá di kua 7 persona ta risibí kuido intensivo.

Djasabra tras di lomba un pashènt ku tabata hospitalisá pa motibu di COVID-19 a fayesé. Esaki ta trese e sifra na 193.

Mester indiká ku ounke poko poko pero sigur, t’asina ku tin 105.000 persona ku a vakuná, aki na Kòrsou. Konforme e relato di gobièrnu t’asina ku esaki ta danki na e esfuersonan di henter komunidat.

Di otro banda ta pidi pa respetá esun ku no ta deseá di vakuná i no mester deskurashá tampoko esun ku si ta interesá pa vakuná.