WILLEMSTAD. - Hopi di esnan ku a testiguá e atrako ku a tuma lugá ayera mèrdia na Meeuwenlaan Amsterdam Noord riba un trùk di plaka, a splika ku e loke ku nan a mira tabata parse guera. Atrakadónan bistí na pretu ku kara tapá i ku armanan grandi outomátiko tabata tira konstantemente den laira, miéntras otronan tabata yena un Audi i un Cayenne ku oro i tambe djamanta. Despues ku nan a yena nan outonan e grupo a hui for di e sitio.

Tabata mas o ménos algu pasá di 2 or di mèrdia ku sentral di polis na Amsterdam ta risibí infrakshon ku lo mester tin un atrako armá tumando lugá na Meeuwenlaan Amsterdam Noord. Mesora sentral a despachá un kantidat grandi di patruya di polis pa e sitio, pero e atrakadónan a bai kaba for di e sitio den diferente outo.

...Atrakadónan na kareda...

Intervenshon rápido di polis a pone ku polis a señalá e vehíkulonan i pa medio di helikòpter ku a subi rápido por a sigui e atrakadónan den nan huida.

Durante nan huida e atrakadornan ta logra kima dos outo. Despues di un persekushon intensivo ku tiramentu riba otro for di den outo durante e persiguishon ku a kaba riba un weiland. Segun polis tabata un milager ku mas hende no a risibié bala, pa motibu ku e interkambionan di bala tabata realmente intensivo.

Den un otro outo e atrakonan ta yega na Broek na Waterland i a subi un “Weiland” na pia i a trata di kore bai. Akinan tambe a surgi tiramentu bai bin entre di polis i e atrakadónan i akinan tabata momentu ku tres di e atrakadónan a keda heridá pa bala di polis, di kua un di nan ta fayesé.

Ounke for di seno polisial no tin muchu informashon di e atrakadónan, pero for di fuentenan ta hasi menshon ku algun di e atrakadónan ta di desendiente belgikano i franses. Un di e atrakadónan a keda arestá riba karetera A16.

Segun fuentenan, e lote ku a keda hòrtá tin un balor di 50 mion euro na oro i djamanta.

Mesora riba retnan sosial por a tuma nota di atrako momentu ku esaki tabata tumando lugá i tambe e arestonan i tiramentu ku tabatin riba e Weiland.