WILLEMSTAD.-  Doño di restorant Gouverneur de Rouville ayera presentá den “Covid Zitting” pa inkumplimentu di orario i òf e reglanan ku gobièrnu a stipulá durante e pandemia di COVID-19 aki na Kòrsou. Ayera pa promé bia korte a kuminsá trata e kasonan aki.

E direktor W. Hendriksen (55) a presentá pa responsabilisá su mes.

Segun fiskal Awadhpersad dia 24 di desèmber 2020  pèrsonal di e restorant tabata duna servisio ainda, despues di 8 or di anochi, siendo ku e regla tabata ku nan mester sera promé ku e orario di “toque de queda”, ku e tempu ei lo a kuminsá 9 or di anochi.

Segun e prosèsverbal di e tim multidisiplinario, nan a yega 13 minüt pasá di 8 haña mas di 20 kliente trankil di nan sintá na mesa.

Hendriksen a bisa ku esei ta kuadra pasó ora 8 or a bati ainda tabatin algun kliente ku a paga nan sèn i e mester a  kaba di sirbi nan. El a bisa ku no ta kuadra ku tabatin 20 hende sino 14 hende.

Tabatin hende ku e ora ei a kore bai wc òf kaba di paga nan kuenta. El a bisa loke mas a molesti’é ta ku e dianan ei tabatin klientenan ku a bin pa sena di Pasku. Nan a pidi nan kuminda pa sinta kome trankil.

Tin ku a kome basta lihé pero no ta tur a bai meskos. E ta bisa ku el a splika e klientenan ku nan mester ta na ora pa sera, sino nan komo personal tin ku karga e konsekuensianan.

Pero ora ta trata di hende, esaki ta bira difísil pa atendé i pa nan komprondé i nunka por logra saka tur hende fo’i dje lugá.

Fiskal a sigui bisa ku dia 28 di desèmber algun dia despues tambe e tim multidisiplinario a bolbe yega na mesun restorant i haña nan ta duna servisio ainda despues di 8 or di anochi.

Riba esaki Hendriksen a bisa ku e  dia ei e tim a bin ku mas di 14 hende den su lugá for di 20 pa ocho i kuminsá skibi but. E ta haña esaki no tabata nesesario.

Hues Doelder a duna di konosé, ku segun e prosèsverbal  e klientenan un bia mas tabata trankil na mesa sintá despues di 8 or di anochi.

Hendriksen a bisa ku esei no ta bèrdat pasó e agentenan a yega  20 pa 8 di anochi.

Fiskal a splika ku e but normal ta 3000 florin pero debí ku a atvertí  restorant  kaba, e ta haña ku 20% mas tantu ku a bira 3600 florin.

Huntu e dos butnan ta bira 7 mil mas 200 florin, pero e ta lag’é na 7 mil florin.

Hendriksen a bisa ku e no ta di akuerdo, pasó mester tene kuenta ku e klientenan  nunka ta kaba na tempu pa nan por bai.

Hues den su desishon a duna di konosé  na e direktor ku e tin komprenshon pa loke el a trese dilanti, pero tin regla i lei i tur hende mester kumpli ku esaki.

Hues ta desviá for di e demanda di fiskal i ta yega na un kondena di 3000 mil florin kondishonal pa e promé but i e di dos but e propietario di Gouverneur mester paga 3 mil florin.

Pues 6 mil florin di kual 3 mil kondishonal.

Hendriksen a bisa ku e ta paga e suma, miéntras fiskal a bisa ku e ta bai pens’é.