WILLEMSTAD.- Outoridatnan polisial ku e diferente unidatnan di investigashon a tene entradanan hudisial ayera mainta tempran, kaminda a detené 6 sospechoso di ladronisia di outo.

Komunidat un biaha mas ta den gara di e ladronnan di outo, pero kuerpo polisial ta aktua den detenshon di e ladronnan pero tambe den konsientisá pueblo kiko hasi pa evitá di bira víktima na man di e malechornan aki.

Polis ta informá ku kontinuando ku investigashon relashoná ku diferente kaso di ladronisia di vehíkulo, personal di e tim ku ta investigá e krímennan aki konhuntamente ku otro timnan di Kuerpo Polisial a tene entrada hudisial na diferente adrès.

Djárason 22 di novèmber 2023 alrededor di 5 or di mainta e timnan a bai na un adrès na Medema Park (Muizenberg) i a hasi detenshon di e hòmber sospechoso J.J., di 37 aña di edat i tambe a konfiská un vehíkulo.

Seguidamente a bai na Montaña Rey i a detené e dos hòmbernan sospechoso Ch.K., di 38 aña i U.K. di 36 aña di edat. Einan tambe a konfiská un vehíkulo.

Despues a siguí pa Phoenixweg i a konfiská un vehíkulo. A bai tambe na Welatinaweg i einan e timnan a detené e hòmber sospechoso R.P. di 30 aña di edat.

Na Huzarenweg a hasi detenshon di e hòmber sospechoso A.H., di 38 aña di edat.

Finalmente a hasi detenshon den Atemisiaweg di e hòmber sospechoso R.S., di 25 aña di edat. Tur e sospechosonan ta nasé na Kòrsou.

Mas aleu tambe riba Winston Churchillweg a konfiská un vehíkulo. A presentá e  sospechosonan dilanti un fiskal ouksiliar ku despues di nan interogashon a ordená nan enkarselashon pendiente di mas investigashon.

Riba e kombinashon di fotonan un bista di e diferente entradanan hudisial.