WILLEMSTAD.- Korte di apelashon ayera a apsolvé e akusado femenino S.Walle (22) di kulpa, pero a konden’é na 60 ora di trabou pa e fayo ku el kometé den tráfiko, mas 6 luna sin reibeweis i 18 mil florin na daño perhuisio ku e mester paga famianan di e víktima ku a fayesé den tráfiko.

Ta trata di e kaso di aksidente ku morto ku a tuma lugá dia 22 di yanüari 2019 riba Andres Belloweg krusada /Pater Poeiszstraat, kaminda e víktima Leonel Shurnel Elias, nasé na Hulanda dia 14 febrüari 1991 a pèrdè su bida.

Den e veredikto di korte di promé instansia, hues a duna di konosé ku korte no ta haña ku tin pruebanan pa kulpa e akusado komo esun ku a kousa morto di e víktima. Ayera e tribunal di Hof tabata di mesun opinion den su veredikto.

Riba e dia enkuestion e akusado tabata den su vehíkulo. Dado momento el a para e pikòp mei mei di kaminda na e krusada, ku e intenshon pa e sigui kore, pero a surgi un choke inevitabel.

Segun e veredikto, konforme e deklarashon di e  akusado, el a para na e krusada pa shofùr di e promé bròmer pasa.

El a splika ku e no a mira e lusnan di e promé ni e di dos bròmer.

Pero el a tende zonido di e promé bròmer si.

Ora ku el wanta brek un bròmer a kore pasa, pa despues e otro a kore bin pega den dje, ku e resultado fatal.

Segun deklarashon di testigunan, e akusado no a duna e bròmernan preferensia, na momento ku el a yega e krusada.

Tantu den korte di promé instansia  komo korte di apelashon a duna abogado Martina rason ku esei no por ser probá. Mirando esaki korte a konsider’é un fayo .

Tata di e víktima a bisa ku e yu su hòbi tabata kore bròmer i nèt e dia ei, el a kaba di harm’e i pa promé bia a sali kuné, sin nunka a regresá kas. E akusado a splika ku niun momento tabata e intenshon pa el a kousa e aksidente.

Abogado general a bisa ku e ta haña ku e víktima a kore outo di manera iresponsabel, dor di para su vehíkulo direpente mei mei di kaya, pone ku e bròmer a bin dal den dje ku e konsekuensia fatal.

Mirando tur esakinan fiskal a haña e akusashon probá i a demandá  Walle na 100 ora di trabou pa pa komunidat, mas 1 aña inkondishonal sin reibeweis.

Den korte di promé instansia Walle a keda kondená na 60 ora di trabou pa komunidat, mas 6 luna sin reibeweis. Tantu Ministerio Públiko komo e defensa di Walle a apelá e sentensia i ayera e tribunal di Hof a konfirmá e sentensia di korte di promé instansia.