Nan dos a presentá den korte komo bon amigu awor

WILLEMSTAD.- Un hòmber  akusado di 34 aña nase na Haiti, a presentá ayera den sala di korte pa motibu ku dia 14 di mei aña pasa, el a destruí I-phone di su eks, dor di zuai esaki lag’e bai kai riba kaya.  Tambe e ta keda akusá di a plama videonan seksual i tambe fotonan íntimo di e dama riba medionan sosial. E akusado a presentá ayera huntu ku e dama víktima, pa responsabilisá su mes pa e akto. El a bisa ku riba e dia ei e tabatin un diskushon ku e dama na su kas. Durante e diskushon, direpente e dama a sali bai. Esaki a pone ku el a bèl su amigu pa bin busk’e, pa nan bai kore  buska e dama.

Dado momento nan a lokalisá e dama den Saliña. Nan a kore su tras i a bai den direkshon di Janthiel. Despues el a bisa e amigu pa kore den banda di e outo ku e dama tabata aden i asina a oblig’e pa e para. E dama ku tabata huntu ku su primu, a para baha fo’i outo hopi rabia. Ora ku el a baha, e akusado a pidié pa wak den  su telefòn. E dama no kier a dun’e e kódigo di e telefòn i esei a pone ku e akusado a bira furioso, kue e telefòn  zuai esaki abou.

E akusado a bisa ayera ku si e tin ku paga e daño e ta hasié ku hopi amor. El a konta  ku el a pidi e dama pa wak den su telefòn, pa motibu ku ora el a sali bai fo’i su kas, e no tabata sa ku ken el a bai i kier a wak ken el a laga busk’e.

Pa loke ta trata e videonan íntimo ku M.L. ta keda akusá di a manda viral, el a bisa ku esaki no ta kuadra.

Segun e akusado el a manda un video pa un amiga di e dama, pa motibu ku e amiga a insistí ku e dama a bis’e ku nan no ta huntu mas ku otro. Pa komprobá  ku esaki no ta bèrdat, el a kue videonan di nan dos den intimidat pa e amiga wak.  Aparentemente e amiga lo mester a manda esaki pa e dama su mama, ku segun e akusado a hasi e kos grandi sin mester, paso e mama  no gust’e pa su yu.

E dama víktima  ku tambe tabata den sala ayera a bisa ku e no ke niun daño perhuisio. Aworakí nan ta bon ku otro bèk komo amigu i e ke kaba e asuntu aki.

Fiskal a haña e akusashon probá i a demandá e akusado na 60 ora di trabou kitando 16 ora ku ta e 8 dianan ku el a sinta.

Wes den su desishon no a mira motibu pa desviá i a bai kompletamente di akuerdo ku e demanda di fiskal.