WILLEMSTAD.- Parlamentario pa Partido Nashonal di Pueblo (PNP), Sheldry Osepa no tin kunes ku su manera krítiko di hasi pregunta durante e reunion di Komishon Sentral ku minister di Finansa, Javier Silvania no a kai na agrado di lider di frakshon di MFK, Gilbert Doran. “Mi ta representante di pueblo i ta den parlamento mi ta hasi mi trabou i hasi pregunta manera mi tin gana”, Osepa a bisa komo kontesta riba remarke di Doran.

Segun e lider di frakshon di MFK e koalishon di e dos partidonan ta manera un matrimonio i no ta “nice” ku no a hasi uso di e oportunidat pa haña informashon i hasi pregunta interno. “Osepa no ta hasi uso di e oportunidat aki pero si ta “hasi loke el a bin ta hasi”, Doran a bisa.

Manera EXTEA a informá for di djaluna mainta t’asina ku tabatin reunionnan separá pa frakshonnan di MFK i PNP por a haña informashon serka konseheronan di minister Silvania riba e tópiko di maneho di Ontvanger pa limpia su registronan. Frakshon di MFK a haña informashon promé i den reunion di Konseho di Minister e petishon a bai pa frakshon di PNP tambe sinta den un seshon ku e konseheronan.

Esaki a tuma lugá siman pasá djabièrnè. Na e reunion aki parlamentarionan Elvin Gerard i Corine Djaoen-Genaro tabata presente miéntras ku Osepa i Gwendell Mercelina no tabata por a akudí.

Osepa a bisa ku no mester kere ku ta hinka su persona den niun kamber pa splik’é nada. “Ta p’esei tambe ami no a firma niun protokòl”, el a sigui bisa indikando na un protokòl ku partidonan di koalishon a traha den pasado ku palabrashon kon ta atendé ku sierto situashonnan polítiko ku por surgi.

Osepa a enfatisá ku miéntras partido PNP dun’é e oportunidat e ta hasi su trabou den parlamento i ta hasi pregunta manera e ta haña ta bon. “Si ta gusta òf laga ami no tin kunes. Het zal me een worst wezen”, Osepa a kontestá.

Tambe el a mustra ku ta pregunta serio e ta hasi a base di un veredikto di korte i ku e ke haña kontesta riba su preguntanan. El a lamentá na mes ku un okashon ku no tabata atendé ku e reunion di djaluna último ku e seriedat nesesario.

Miembro di parlamento pa PNP, Gwendell Mercelina na su turno a bisa ku e nivel di e reunion ta baho i mahos. Meskos ku vários otro parlamentario e tambe a ripití su preguntanan pasobra na su opinion minister Silvania no tabata duna kontesta.

El a mustra ku ta mas ku 1 aña pasá el a puntra e minister si e desishon ku a tuma pa eksonerá 3 miar florin na debe di impuesto tin un base legal i pa splika kon e toma di desishon a kana, pero e no ta risibí kontesta riba e pregunta aki  “Pa minister bista ku el a kontesta e preguntanan no ta korekto”, Mercelina ta deklará.

Foto:

...Sheldry Osepa...