Godett: Mas tarda mas grandi e problema bira

WILLEMSTAD.- Kolaboradó di frakshon di partido KEM, Anthony Godett ta hasi un apelashon urgente riba Aqualectra pa kuminsá instalá e sistema di Pagatinu pa awa. E situashon di kasnan ku ta deskonektá for di e ret di awa ta birando alarmante, esta Godett.

“Tin hopi hende ku tin debe haltu di awa.” Godett ta bisa ku e ta risibí diferente hende ku ta pidi ayudo, pero e problema ta birando asina grandi ku no ta logra yuda tur. Ku instalashon di e sistema di Pagatinu pa awa ta konsientisá e usuario riba uso responsabel di awa. Tambe ta prevení ku e ta krea un debe ku e no por paga, esta Godett.

Personanan ku a haña but di Aqualectra pasobra a konstatá iregularidat ku nan konekshon ta den un problema mas serio ainda, e kolaboradó di frakshon ta sigui bisa. “E hendenan aki tin ku paga un but i e but aki ta haltu anto pa kolmo nan no por drenta den un areglo di pago pa e but.”

Segun Godett tin entendé Aqualectra tin e aparatonan aki kaba den nan inventario. “Ta for di 1991 ku mi tabata den Konseho Insular ta boga pa introdusí uso di Pagatinu i mi ta spera ku despues di 24 aña awor si ta kuminsá instalá e sistema aki pa asina usuarionan kuminsá karga responsabilidat propio pa nan uso di awa.”

Mas aleu Godett ta kere ku mester bini ku kampaña di informashon intensivo pa asina siña siudadanonan ku nan mester evitá ku nan ta krea debe. E ta mustra mas aleu ku e kampaña di ministerio di Desaroyo Sosial, Labor i Bienestar (SOAW) ta yegando na su final i ku esei tambe e fondonan ku ta disponibel pa yuda hendenan ku tin debe.

Finalmente Godett ta bisa ku mas tarda ku instalashon di e sistema di Pagatinu, mas pió e situashon ta bira. E ta proponé tambe pa Ministerionan SOAW i Desaroyo Ekonómiko sinta huntu pa wak kon por yega na un situashon ku ta duna eksonerashon di e debe pa asina konektá kasnan di famia atrobe riba e ret. “Na mes momento ta hala un liña i tur ku despues kai den problema ku debe tòg mester buska un manera pa wak kon nan mes ta sali for di dje.”

Foto:

...Anthony Godett...