Segun Stephen Walroud

WILLEMSTAD.- Ta parse ku e plannan di (BMA) ta bèk riba mesa. Esei ta e konklushon ku èks miembro di Konseho Insular i èks miembro di parlamento pa partido PAR, Stephen Walroud ta yega na dje despues di a tuma nota di e plannan di gabinete Pisas II pa traha diferente konstrukshon di betòn riba playanan na Lagun, Jeremi i Caracasbaai.

Walroud ta bisa ku e idea pa lanta un BMA ta data for di 2005/2006 i tabata plan di èks diputado Gerrit Schotte. Via di e outoridat aki ta manehá playanan públiko na Kòrsou den tur sentido. E plan ta pa krea un struktura di maneho pa playanan kaminda eksplotashon di bar, stulnan di playa, parasòl èts., ta kai bou di e BMA ku ta  hür e konseshonnan ku esnan ku ta eksplotá e negoshi.

Walroud ta sigui bisa ku e imágennan digital ku el a mira di e plannan aktual ta parse e pinturanan ku el a mira di  e plan di BMA. “Ta poko mas moderno so nan ta, pero ta práktikamente e mesun modelo.” E BMA, esta Walroud, tabata un konstrukshon pa “friends and family” a haña pida negoshi pa nan traha plaka kuné.

“No ta tur hende ta bin na remarke pa haña un konseshon, por konta ku ta esnan bon ku partido polítiko den gobièrnu ta haña.” Mas aleu e ta mustra ku miéntras otronan ta gana plaka ku e konstrukshon aki ta ku plaka di komunidat ta traha e fasilidatnan manera bar riba playa di Lagun. “Ta trata aki di lokalidatnan prinsipal kaminda lo kibra e balansa natural di playanan di Kòrsou.”

Petroudis

E konosido habitante di Bándabou, Tirso Petroudis tambe ta preokupá ku e desaroyonan ku ta tumando lugá. E ta bisa den un opinion personal ku ignoransia, falta di skucha kiko pueblo ke, keda sin informá bo mes kiko a palabrá den pasado i hasi kos sin komuniká ku bario, por trese broyo innesesario. “Nos no mester lubidá ku no muchu tempu pasá kier a bini ku invershonistanan bin eksplotá playanan di Bándabou i ku e pueblo di Bándabou kompleto a bisa ku ke mantené e playanan mas original ku ta posibel.”

E ta bisa ku e ta kontra e plannan aktual pa konstruí riba e playanan i laga otronan bin eksplotá e fasilidatnan aki, meskos ku e tabata kontra e plannan den pasado. E ta na fabor pa bini ku pèrmitnan pa invershonistanan chikitu rondó di playanan pa nan por ehersé nan trabounan sin e doló di kabes ku otro invershonistanan ta saka nan afó.

Petroudis ta mustra ku habitantenan di Lagun, Kenepa, Westpunt i Sta. Cruz ta habrí pa dialogá i ta urgi nan pa papia liber i hasi loke ta mihó pa bario i tambe gobièrnu. Finalmente e ta puntra si a informá e barionan ta ken ta bin manehá e playanan i dikon tin miedu pa a drenta den diálogo promé ku a konstruí. “E forma kon kosnan ta bai ta pone hende di bario kontra otro sin ta na nodi.”

Foto:

...Stephen Walroud...