Faltando 1 siman pa promé di desèmber

WILLEMSTAD.- Aki 1 siman mester tin klaridat riba e kontrato ku Refineria di Kòrsou (RdK) a firma ku Oryx Midstream pa operashon di instalashonnan na Emmastad i e terminal na Bullenbaai. Mester  tin un “government agreement” i alabes traspaso di trahadónan di Curaçao Refinery Utilities (CRU) mester ta un echo pa promé di desèmber awor.

E “government agreement” aki ta enserá akuerdo i palabrashonnan ku Oryx Midstream mester sera ku diferente entidat i kompania na Kòrsou. Ta trata di stakeholder manera servisio di impuesto, Aqualectra, Kompania di Tou Kòrsou (KTK) i Curoil ku mester a negoshá ku nan den lunanan tras di lomba. Mester yega na e “government agreement” aki promé ku firma un kontrato final.

Pero pa yega na e akuerdo aki tabatin un lista ku 100 punto ku partidonan mester a pasa den dje. Te ainda no a tende nada di kon e proseso aki ta kanando. Faltando 1 siman pa promé di desèmber no tin indikashon tampoko di parti gobièrnu, ni RdK ni Global Oil ku ta logrando den e negosiashonnan aki.

Relashoná ku invershonnan nesesario pa habri e refineria di nobo ta menshoná un suma di  70 mion dòler ku Oryx Midstream ta bai invertí den 5 aña pa drecha instalashonnan na promé Bullenbaai i despues Emmastad. E invershon aki ta enserá ku refinashon di petroli na Kòrsou a yega na su fin i manera promé minister Gilmar ‘Pik’ Pisas a bisa den reunion di parlamento, esta ku Global Oil ta bai konsentrá partikularmente riba merkado lukrativo di meskla produktonan petrolero ku ta refiná kaba (“blending”) pa yega na gas oil, zeta di motor i disel di diferente grado i spesifikashon pa diferente uso. Oryx su enfoke prinsipal di negoshi pues no ta refiná krudo.

Pa hasi e “blending” posibel almasenahe di produktonan mesklá ta nesesario prinsipalmente na Bullenbaai i parsialmente na Emmastad. E modelo aki ta hasi posibel pa usa e infrastruktura eksistente (lesa: tankinan) sin e polushon di ántes, esta Pisas.

“Mientrastantu gradualmente ta sigui modernisá e fasilidatnan pa akomodá e modelo di negoshi di meskla produktonan refiná kaba i hasi esaki mas lukrativo. Si no a logra firma un kontrato ku Oryx Midstream pa hür di terminal na Bullenbaai i refineria na Emmastad, pa promé di yanüari 2026 no tabatin perspektiva mas pa e refineria”, Pisas a bisa.

Tankero

Entretantu tin bastante insertidumbre rondó di e “Bolivar Act” ku “House of Representatives” di Merka a aprobá resientemente i kiko esaki ta nifiká pa e negoshi den produktonan petrolero for di Venezuela. E lei ta prohibí gobièrnu di Merka pa kontratá personanan ku ta hasi negoshi ku e gobièrnu no legítimo di Nicolas Maduro i kualke otro gobièrnu susesor di Venezuela ku no ta rekonosé komo legítimo pa gobièrnu Merikano.

Pa e motibu aki e lei ta boga pa mantené e sanshonnan aktual kontra e gobièrnu di Maduro i ekspandé e sanshonnan pa asina limitá rekursonan di Maduro pa sigui abusá di e libertat i prosperidat di e pueblo venezolano. E lei aki ta lanta interogatorio riba tankero di krudo ‘Dahlkut’ ku ta nabegá pafó di kosta di Kòrsou. El a sali Trinidat & Tobago rumbo pa Bullenbaai i mester a mara for di 13 novèmber.

E tankero sinembargo ta “drift” pa mas ku 1 siman kaba sin por drenta e haf di Bullenbaai i pregunta ta si esaki tin di aber ku no kumplimentu ku lisensianan i sanshonnan mas severo ku Merka ke bai imponé.

Foto:

...Tankero 'Dhalkut' ku tin 1 siman kaba ta drif pafó di kosta di Kòrsou...