Tin tur indikashon ku lo surpasá 80000 votadó

WILLEMSTAD.-Konseho Supremo Elektoral a presentá e di dos briefing pa e dia aki di elekshon. Presidente Pacheco Römer a informa ku e kantidat di hendenan ku a akudí na urnanan te ku 4’or awe tardi ta bastante mas tantu kompará ku mesun orario kuater aña pasá. E hefe di Kranshi, sra. Haddokcks a konfirmá ku e aña aki mas tantu hende a buska nan karchi di vota.

Römer a sigui splika ku e kantidat di hende ku a bai urna te ku 4’or di atardi ta 64.420, kompará ku kuater aña pasá esei ta un oumentu basta grandi. Na 2017 te 4’or e kantidat di votadó ku a hasi uso di nan derecho di voto tabata 51361, pues 13059 ménos ku e aña aki. E sifranan aki ta splika e komentario ku por a skucha for di mainta ku tin reinan largu na urnanan.

For di momentu di sostenementu di lista na fin di yanüari KSE a hasi e remarke ku tabatin un kantidat record ku a hasi uso di e posibilidat pa sostené un lista. For di e momentu ei a indiká ku e interes pa elekshon tambe ta pinta di bai bira mas grandi, anto e sifranan di awe ta demostrando esei. Römer ta kere ku tin tur motibu di pensa ku e bia aki lo aliansa un asistensia na urnanan ku lo surpasá 70%. Esei ta nifiká ku lo surpasá e kantidat di 80.000 hende ku a depositá nan voto. Mas detaye den edishon di EXTRA.