Segun Willem ‘Billy’ Jonckheer

WILLEMSTAD.- Si Kòrsou ke sigui krese ekonómikamente, no solamente den sektor di turismo, pero den tur sektor, mester yega na un maneho integral pa estranheronan por bin biba i traha legal na Kòrsou. Billy Jonckheer, ku Kandidato pa elekshon awe na Kámara di Komersio pa representá kompanianan grandi, a trese esaki dilanti den e “podcast”, 3’or ku Gino.

Ekonomia

Segun Jonckheer ta opservá den sektor di turismo i konstrukshon kosnan ta kanando hopi bon na Kòrsou. El kaba di sali un konferensia riba invershon pa hotèlnan i a tuma nota ku tin hopi interes pa invertí na Kòrsou i kosnan ta kanando den un bon kaminda. Pero, Jonckheer ta bisa, tin sierto kos si ku mester drecha. Banda di e loke ku un invershonista ta wak, ku ta salubridat i edukashon, mester di un  masterplan ekonómiko pa otro sektornan.

“Ora un hende invertí e no ta wak solamente su posibilidatnan pa hasi ganashi. Kòrsou mester sòru ku tin ekspertonan riba otro terenonan presente den pais. Entre otro kuido médiko i nivel di edukashon mester ta bon, pasobra ta aspektonan ku un invershonista ta evaluá promé e tuma un desishon definitivo.”

Loke ta bon na Kòrsou ta, ku e ta parti di Reino Hulandes, Jonckheer ta sigui bisa. Spesialmente ku Korte Superior ta na Den Haag. Esaki ta pone invershonista tuma desishon pa invertí na Kòrsou pasobra e sa ku den kualke eventualidat e tin leinan ku ta proteh’é. Tambe el a bisa s ku loke Kòrsou tin ta úniko i mester hasi bon uso di dje.

Jonckheer ku a kuminsá su karera den organisashonnan ku ta promové kresementu ekonómiko na aña 1992, i semper a traha pa yuda krese e posibilidatnan ekonómiko pa nos isla. Despues di forma parti di e kresementu di turismo via di representashon den CHATA, e la djòin Kámara di Komersio kaminda e la fungi komo presidente pa 13 aña i forma parti di vários organisashon pa yuda krese su konosementu i kontaktonan den region pa hiba Kòrsou dilanti.

Holland House

Un di e funshonnan ku Jonckheer ta okupá aktualmente ta miembro di direktiva di Holland House na Colombia. E ta splika ku Holland House ta un inisiativa di Kámara di Komersio i otro partnernan den Reino ku ta promové negoshi entre Colombia i Reino Hulandes. “E ta manera un Kámara di Komersio bilateral.”

E organisashon ta eksistí mas ku 10 aña i tin kasi 500 miembro ku ta kompanianan Colombiano i tambe kompanianan di e paisnan den Reino. Ta hasi “networking” i asina ta promové invershon den pais. Jonckheer ta kere ku Colombia ta duna oportunidat grandi pa kresementu ekonómiko na Kòrsou.

Un di e oportunidatnan ku e ta para ketu na dje ta e forsa laboral. E ta mustra ku ta bai tin mester di entre 4 pa 5 mil hende pa traha na hotèlnan so. Esaki ta kuponan di trabou nobo ku ta bai habri.

“No ta bai haña tur e hendenan aki na Kòrsou. Mester kuminsá wak pafó di Kòrsou pa yena e posishonnan.” Na opinion di Jonckheer Colombia ta un di e paisnan ku ta duna un bon oportunidat pa yena e posishonnan aki.

“Tin hopi hende yòn profeshonal na Colombia ku por yena e kuponan di trabou i kria nan famia aki na Kòrsou.” E ta mustra ku na 1918 no tabatin hopi aktividat ekonómiko na Kòrsou, te ora ku refineria a habri. Loke a pasa ta ku hendenan for di diferente parti den Karibe, Sürnam i Madeira a bini Kòrsou pa traha.

“Nan a bira kurasoleño i a yuda komunidat di Kòrsou krese. Mi ta kere ku Kòrsou ta na e punto ku si ke sigui krese ekonomia di pais den tur sektor, mester bini ku un regla ku estranheronan por bin traha na Kòrsou pagando impuesto i primanan sosial pa asina por sigui mantené nos estado di kuido i paga pa e infrastruktura ku ta nesesario .”

Meskos ku tur sobra yu di Kòrsou Jonckheer ta orguyoso di e prestashon di selekshon nashonal di futbòl. E ta mustra ku e atenshon ku Kòrsou ta haña a base di e kualifikashon pa Kopa Mundial 2026 ta impagabel. “Ta tur kaminda riba ret sosial ta papia di Kòrsou.”

E ta mustra ku komo pais chikí Kòrsou a hasi estrago riba tereno di baseball profeshonal, “little league” i awor ku futbòl loke ta pone pais riba mapa mundial. “Pues, e logronan deportivo naturalmente ta yuda i ta pone ku hendenan ta buska pa sa ki oportunidatnan tin na Kòrsou.”

E elekshon ta tuma lugá awe mainta entre 9:00 i 12:00 na Kámara di Komersio.