WILLEMSTAD.-  Ayera korte di promé instansia a kondená e hóben akusado Louisyn “Minguelito” Yeung di apénas 19 aña, na un kastigu di 7 aña komo esun ku a duna instrukshon na otronan, pa kometé atrako brutal i armá riba dos trahadó ku tabata entrega sigaria na tokonan den área di Banda Abou. Na aña 2017 Yeung a keda kondená na un kastigu di 36 luna di kual 18 kondishonal di detenshon hubenil, despues ku polis a hañ’e  ku un arma outomátiko ku lachi largu sintá den un vehíkulo, ku tabata kargá ku arsenal di arma i droga dia 13 di sèptèmber 2016. E tempu ei Yeung tabatin 15 aña.

Polis riba e dia enkuestion a persiguí un karavana di  6 vehíkulo ku a kaba di sali fo’i St Joris baai. Na altura di Rio Canario outoridatnan a blòkia un di e vehíkulonan  den kual Yeung i un primu tabata  sintá aden. Polis a kanta bingo ora ku nan a listra e vehíkulo i a haña un kantidat di pakete ku tabata kontené basta droga, arma i munishon. Na tur outoridatnan a konfiská e dia ei 182.265 gram di koka, 113.20 gram di mariwana, 7 arma di kandela, 10 kashi di bala i mas di 170 munishon. Debí na su edat, el a haña kastigu di detenshon hubenil.  Dia 23 di yanüari 2019, Yeung ta bolbe wòrdu detené pa arma di kandela, despues ku a surgi un tiroteo na altura di Mal Pais. Testigunan a yama polis i bisa ku nan a mira algun hòmber ku tabata kore den un
VolksWagen jetta i tabata los bala den laira. Riba indikashon di e informashon, polisnan a kore yega na e sitio i topa e vehíkulo. Mes ora nan a dròp e hòmbernan i a haña 2 arma den e vehíkulo.  Yeung tabata e shofùr di e vehíkulo. E okupante ku tabata sinta patras a bisa ku e armanan tabata di dje, di kual Yeung a keda apsolvé di kulpa.

Dia 18 di yüli 2019, 2 trahadó di e kompania Sultan N.V, a keda atraká ora ku nan a bai hiba karga na toko San Juan Center na Soto.

Dos pa 3 hòmber a bula baha bisti na paña nan di guera(kamuflahe) i  ku arma a menasá e trahadónan, kita nan pertenensianan for di nan( manera entre otro nan pòtmòni ku nan karchinan personal ) i a bai ku e vèn kolo blanku ku tabata kontené un kantidat grandi di slòfnan di sigaria na balor di 40 mil florin. Den e pòtmòni nan tabatin 1000 i 250 florin.

Durante nan huida nan a trapa riba pia di un di e trahadónan ku a keda benta abou banda di e vèn. Mes ora polis a kuminsá ku un investigashon. Nan a tap telefòn di Yeung nèt algun ratu despues di e atrako.

E agentenan por a logra skucha vários kombersashon entre e akusado i e otronan ku na nan pareser, tin di aber ku e kaso di atrako.

Despues di e investigashon   ku a haña e nòmber “ Mac” polis a tene un entrada hudisial algun dia despues na kas di Yeung i a detené e mes, L. Albertus,(16), Eumile Jamanica(20), Ludshandro Girigorie(22), Rujevanie Leonard(20) i Raylison  Mongen(24).

Durante e yamadanan telefóniko ku a keda skucha, polis por a tende ku Louisyn  riba  dia di atrako, promé ku e atrako a tuma lugá,  a yama e akusado Jamanica ku ta keda yama “Micho”  kaminda e ta bis’e: “sigui nan  te ‘San Juan’. Nan tin T shirt kolo krem bisti i nan ta den un vèn blanku”.  “Studia nan, tene mi na altura i laga mi sa” . “Nan a kaba di kobra mas o ménos 400 florin for di e hende nan aki banda i e vèn ta kan kan di e kosnan aya”. Jamanica despues di algun ratu ta bèl Yeung bek i ta bis’e  “Hei mi ta nan tras aki,    ma kaba di pasa bo kas”.  Yeung na su turno ta bisé : “para banda di nan, baha fo’i outo i drenta den e toko kumpra algu”. Nos  ta biniendo.  Despues di algun minüt Yeung ta bolbe yama: ‘”Nan ta para aworakí na toko San Juan na e chines.” Ma kaba di pasa pero lo mi bira bek”. Despues di algu minüt , Yeung ta bolbe yama Jamanica i ta bis’e “ Master bosnan ta, hopi rèspèt pa bosnan. “ Skonde bon”.  Durante ku polis tabata tuma e denunsia di e víktimanan, nan a tuma nota ku ámbos tabatin t shirt kolo krem enberdat bisti .

Esaki ta pone ku e kòmbersashonnan ku a keda di tap i e imágennan di kámara di  toko “San Juan Center kaminda e suseso a tuma lugá, ta haña sosten. Aki por a mira ku ámbos trahadó tabatin t shirt krem bisti i tambe ku tabatin basta kaha di sigaria den e vèn ku tabata kolo blanku. Tambe e imágennan di kámara ta konfirmá ku promé ku esei enberdat nan a para na toko New Soto ku e mesun vèn pa entrega slòfnan di sigaria. Tambe por a konfirmá ku e telefòn di Jamanica i Yeung tabata  den e área enkuestion e momento di atrako.

Durante e entrada hudisial den kas di Yeung, polis a haña  diferente  paña di kamuflahe. Tambe polis a haña 5 arma di kandela den su kas. Yeung a ninga di sa algu di e arma nan. El a bisa ku niun no ta di dje.

Durante  e yamadanan di tap por a skucha tambe kon Girigorie a yama Yeung  i puntr’e si e tabata huntu ku Leonard. Girigorie durante deklarashon a konfirmá  esei durante  su deklarashonnan.  Yeung a  bisa Girigorie wak pa ora e yega  kas e haña  paden bon limpia. E akusado Albertus a deklará ku e tabata sa di e atrako i ku Yeung a dun’e un tas di guera ku dos arma aden  i dos pòtmòni. El a haña 2 mil florin pa warda e tas riba e mesun dia ku e atrako a tuma lugá.  Tambe el a haña 2 slòf di sigaria di Marlboro.  El a splika ku e “ code” Limpia kas ta nifiká ku e mester a warda e armanan i tambe e lachinan pa Yeung.  Pa loke ta trata e pòtmòninan,  el a benta esakinan afó den mondi na Banda Abou i e armanan el a warda nan tambe den mondi.  Siguiente dia el a hiba nan bek na kas di Yeung.  Albertus  a deklará tambe ku un siman promé  ku e atrako, Yeung a bisa ku e siman ei algu lo bai pasa. Banda di e kombersashonnan di tap, polisnan a haña  aparte di algun “Selfie”, algun video inkriminatorio den Yeung su telefòn.  Nan a haña videonan di vehíkulonan i tambe e pañanan di kamuflahe ku tin paresido na esnan ku e ko- akusadonan a uza durante e atrako. Tambe polis a haña un video di e atrako na “San Juan Center” i diferente imágennan di arma i videonan di arma ku a keda grabá den su kas. Segun e veredikto, e akusado no por a duna un splikashon satisfaktorio. Hues a bisa den su veredikto ku e akusado a mustra na su komportashon ku e konsekuensianan di su aktonan ta lag’e reakshoná gewon friu.   Alabes hues ta haña ku e no a siña di su lès anterior, ni e kastigu ku el a haña. Mirando esaki hues a haña ku e bia aki si Louisyn tin ku haña un kastigu pa largu tempu i p’esei e ta haña ku 7 aña na su lugá.