Boto ku sambuyadó a bòltu

WILLEMSTAD.- Den un informe bosero di Wardakosta ta indiká ku djasabra mainta pa mas o ménos 10:30 Rescue and Coordination Center (RCC) di Wardakosta a haña notifikashon ku un boto a bòltu na altura di Ostpùnt.

Na bordo di e boto tabatin shete persona. Durante di nan esfuerso pa yega tera un ola a sorprendé nan i drenta den nan boto. Komo konsekuensia di e ola e boto a bòltu i tur a kai den awa. E helikòpter di Wardakosta a sali mesora pa lokalisá e personanan. Despues ku e helikòpter a lokalisá nan, RCC a dirigí e vehíkulonan di Wardakosta pa Ostpùnt ku a buska nan i hibanan ‘Steunpunt’ na Parera. Ola a benta nan boto na kosta poniendo ku esaki a dal kibra den e barankanan na kosta.

A logra reskatá tur e shete personanan di kual sinku hende muhé i dos hende hòmber. Tur ta bibá na Kòrsou.