Dia 8 di desèmber Partido Demokrat ta kumpli 75 aña. E ta e partido aktualmente di mas bieu riba nos isla i tin un presidente nobo den persona di Elvis Andrade. Su direktiva ta konsistí di,

Sekretario Rudolf Beaujon,Tesorero Giovanni Juliao, Vice Pres. Ivan Gibbes, 2 Sekr. Nataly Avila

2 Teso. Wilmar Martijn, Komisario Franklin Martie. 75 aña ta henter un bida. Den su tempu di gloria por mira kon dushi Kòrsou tabata. Nos hende grandinan tabata papia di paraiso, DP a pone e fundeshi huntu ku otro lidernan pa sigui kana ariba i ku awe nos por ta un paraiso. Lamentablemente esei no ta e kaso pasobra ta manera nos a keda pega i e fundeshi a kuminsá kibra. Den e estado ei Kòrsou ta awe i ta bale la pena pa un partido manera DP ku su raisnan den pueblo, ku e karbon ainda ta chispa i kla pa sende kandela bèk. Loke mester hasi ta sòru pa e kandela bira e vlam di antorcha pa Kòrsou bira un paraiso bèk. I ta den e etapa ei ta awe ku DP, segun e presidente Elvis Andrade a duna di konosé na Djasabra.

Trese e “krachinan” kas bèk....

Kon lo bai sende e kandela bèk; Elvis a splika ku promé ku el a bira presidente el a trese puntonan dilanti di kiko e ta kere ku mester sosodé. Un punto ku el a menshoná ta ku si papia ku hendenan na Kòrsou no tin un ku no a bisa ku nan no a sali for di kuna di demokrat. Famianan grandi ta ku demokrat i su meta komo presidente ta pa bishitá tur e demokratnan aki, papia ku esnan na bida i pa sa kiko tabata e motibu ku nan tabata demokrat i e motibu dikon no ta vota demokrat. “Nos lo buska tur e “krachinan” pa bin kas bèk i mi ta kere e sede aki lo ta chikitu”, Elvis Andrade a bisa ku palabranan di konvikshon. E ta kòrda komo mucha e karavana manera karnaval, ta kantidat di hende asina tabata mira promé, durante i despues di elekshon ku triunfo di demokrat. I e ke bishitá tur e demokratnan. Esnan ku ta òf no ta ma pa papia personalmente. Nan lo no deskansá pero lo dediká pa sa kiko ta e kousa dikon no ta vota pa demokrat i kiko por hasi pa nan ta den kas bèk. Tempu demokrat tabata den su gloria Antia tabata asina felis, Karibe tabata referí na Kòrsou komo modelo, tempu demokrat na mando, kiko ta e problema ku awor no por trese demokrat bèk. I nos ke traha riba dje pa yega e paraiso ku esnan ku a lanta e partido aki tabata nan meta.

Un lider ta un fasilitadó....

Elvis Andrade ta konosí komo sindikalista i awor e ta polítiko. Pero tambe e ta konosí komo lider den diferente organisashon deportivo. Elvis a bisa ku for di tempu e tabata mucha el a frekuentá e kosnan aki den su bida. El a hasi hopi deporte i no tin niun deporte na nivel di pais manera futbòl, pinpòn, vòlibòl, basket i for di e tempu ei sin e mes tabata ke entrenadó i direktivanan tabata aserk’é komo kapitan di tim. Ora e tabata chikí e no por a komprondé esei, pero sinta den un restorant un bia, tabatin un plachi di un papel i riba dje tabatin e signonan zodiak di Asia i lesando riba dje e ta mira ku e ta Toro i e ta nifiká ku bo ta un lider. Ora el a sigui buska drechi e ta kòrda tempu e tabata mucha semper tabata aserk’é pa e ta lider. Tabatin tempu ku e no tabatin ni edat pa ta lider pero tòg nan tabata aserká e pa e ta lider. Na grandi e tabata presidente di PWFC, SUBT, Asto di Colombia pero no ku e tabata ke pero pasobra e hendenan tabata aserk’é. Awor Elvis por bisa ku presidente ta nada otro ku un fasilitadó. E no ta riba niun hende pero e ta pareu ku tur hende. Ta simplemente den e statuto tin ku tin di forma un direktiva i e komo fasilitadó tin di sòru pa kos kana i tene reunion. I p’esei el a yega na dje. Den sindikato el a yega di bai reunion i tabata hasi preguntanan alkaso ku tabata hala atenshon. E ta kòrda ku tempu ku Shell tabata bai sera e kier a sa solamente si nan por keda den e fondo di penshun. Presidente Gijsbertha e tempu ei den PWFC a puntra pa su persona pa yuda tambe den direktiva di e sindikato. El a drenta komo shopsteward pero despues di 2 aña el a bolbe keda aserka pa ta na kabes di e sindikato. “Kualke funshon ku bo tin den un direktiva ta un fasilitadó bo ta i si bo por sòru kaminda bo ta pa hasi bo responsabilidat i hasi loke ta palabra pa bo hasi, no tin niun kaminda ni hende pa stòp bo di bira loke bo tin di bira den e bida aki” Elvis a enfatisá. Elvis a bisa ku el a hasi kos pa tur partido na Kòrsou, sea esnan ku tei òf ku tabat’ei. I meskos el a hasi pa deporte.

optocht-di-viktoria-i-por-mira-Onofre-Bikker-Efrain-Jonckheer-lider-i-Ciro-Kroon.jpg

Presidente Demokrat....

No ta promé bia ku partido Demokrat ta aserká Elvis Andrade pero e bia aki el a aseptá pa ta den direktiva i den e kaso aki presidente di partido. Pero promé ku a yega asina leu e kier a bai reunion pa papia promé. El a bisa ku na 2008 el a hala atras for di sindikalismo pasobra e funshon ei a okupá su dia di tal manera ku el a bira un hende ku no tin atenshon mas pa famia. I e kos ei pe no tabata bida i e no kier a bai bèk den e situashon ei. El a sali for di tur organisashon i el a haña su bida bèk. Pero despues di tempu el a mira kon Kòrsou ta bayendo i kòrdando kon Kòrsou tabata, hopi desaroyo a tuma lugá pero e desaroyo humano si no a tuma lugá. I p’esei ora  DP a aserk’é, el a bai reunion. El a bisa di no ta fanátiko di niun partido pero ta apresiá loke ta keda hasí pa DP i el a aseptá pa ta den partido Demokrat, Pe DP ta e partido di mas grandi, mas bieu, e partido ku a bin ku mas lei sosial te ku awe esei masha importante pe. Elvis a bisa ku e no ta  un hende di selebrashon i p’esei nunka a mir’é dilanti na niun di e aktividatnan di por ehèmpel proyektonan di Isla na komunidat. E nunka a bin dilanti ounke e ta esun ku tabata tras di tur e proyektonan na komunidat ei, ta e mes a bai te Venezuela na PDVSA pa papia ku nan mester hasi kos pa komunidat. I no mester lubidá ku tempu ku Isla a sera pa partido Demókrata  bai Venezuela pa papia ku PDVSA pa bin Kòrsou. Tabata Bikker i Diaz ku a sera e kontaktonan ku e tempu ei Carlos Andres Perez pa PDVSA por a bin Kòrsou na 1985.

No tin nada di haña den partido Demokrat i esei tambe a pone ku el a aseptá e puesto di presidente.  E no ta gusta nada fásil pero ta un reto pe. I mas opstákulo na kaminda, mihó pe traha pa krese e organisashon den e kaso aki partido demokrat. Den kas di partido  Demokrat nan sa ku te ta presidente pero otro hendenan no sa esei.

reunion-publiko-na-Stadion-di-Rif.

DP lo hiba Kòrsou bèk na ta un paraiso...

Un di e retonan grandi di DP ta yega na un lider. Un lider semper ta importante i pa partido e ta urgente. Pero pe komo presidente e no ta mir’é asina. Pero e grupo grandi ta kere ku mester yega na dje. E lider lo yega na su momentu ku e tin di yega. Su meta final no ta partido demokrat so, pero DP mester ta e vehíkulo pa nos yega na Kòrsou komo paraiso. Probablemente ora e vehíkulo kòrá aki yega i pone Kòrsou kuminsá kana den e direkshon di un paraiso su trabou komo presidente lo ta kla. Pe ta importante Kòrsou. I p’esei e ta apoyá tur koló polítiko ku ta bin ku algu ku ta bon pa Kòrsou. Meta di DP ta pa hasi Kòrsou den paraiso pa nos ta lider, liber di pensamentu, liber pa ekspresá, liber i pobresa i liber di ignoransia. I esei ta e filosofia.

optocht-di-viktoria 

Selebrashon 75 aña partido Demokrat...

Dia 8 di desèmber Partido Demokrat ta selebrá 75 aña. Pa e dia aki segun Elvis Andrade nan tin un selebrashon basta humilde.  75 ta un bida kompleto i ta algu grandi mester hasi pero den e situashon di partido awor lo bai kòrda riba e hende. Lo bai bèk base i hasi algu humildemente. Lo tin santu sakrifisio di misa pa 9 or di mainta na misa di Sta. Maria. Lo rekordá 3 baluarte i lo pone krans na nan bustonan ku ta Ronchi Isa dilanti MIL, SVB tin Ciro Kroon i finalmente lo bai  lider máksimo ku ta Efraim Jonckheer su busto na Otrobanda i di 6 pa 8 di anochi lo tin selebrashon humildemente. Elvis Andrade a bisa ku nan lo tabatin gana di selebre na Avila hotèl, pasobra lantamentu di Partido Demokrat a sosodé netamente na e sitio ei. E selebrashon lo ta unu den nan sede humildemente na Jan Noorduynweg. E selebrashon ta manera su persona ta, un persona humilde. Elvis lo sostené kualke hende na mundu ku ke kaba ku pobresa i ignoransia.