WILLEMSTAD.- Juriel Bartholomeus (22) a bolbe keda kondená na 8 aña den Hof manera korte di promé instansia a dikta, pa maltrato, intento di asesinato i sekuestro di su pareha.
El a apelá su sentensia pa motibu ku e ta insistí di ta inosente i no sa nada di e kaso.
Ta trata di un kaso ku a tuma lugá dia 31 di òktober 2019, ora ku un outomobilista a pasa na altura di Centrum Piscadera, mira un dama bentá abou. E dama tabata zuai ku hansha pa ayudo.
E tabata tur na sanger i heridá na altura di su pechu. Na polis e víktima a deklará ku un ratu promé, su pareha Juriel a bai busk’é fo’i trabou.
Na kaminda e akusado a bis’é ku e tin un sorpresa pe na kas.
Segun e dama, Juriel tabata kore riba un velosidat hopi haltu.
Ora nan a yega kas, Juriel a sera tur bentana i porta. Despues Juriel a kana bin riba dje i puntr’é ken ta Zidano.
E dama a keda asombrá pa motibu ku e no tabata sa kon Juriel a yega na e informashon ei.
El a bis’é ku Zidano ta un amigu bieu di dje.
Juriel a dal e ku moketa hopi duru den su kara, bent’é abou, lastr’é i dal e skòp.
Ora ku e tabata abou bentá, el a mira Juriel kue un kuchú. El a pidi Juriel pa legumai pero Juriel no a tende i a sigui agredié.
Juriel a hink’é ku e kuchú den su pechu banda drechi i drai e.
Segun e dama, miéntras e tabata drai e kuchú, e akusado tabata grita “ Bo sa ku bo no mag di tin niun amigu”.
Tabata trata di un kuchú di 30 cm largu.
E dama a bisa ora e tabata yora di doló, Juriel a bis’é ku e lo hib’é poli.
El a his’é i bai direkshon di outo kuné.
Segun e dama, ora el a kere ku e tabata bai poné sinta dilanti den e vehíkulo, pa nan bai poli, e akusado a his’é benta den baul di e outo. Dado momento el a sinti e outo a para.
E akusado a habri baul sak’é afó i bent’é kantu pida mondi i bis’é ”Si bo no ta p’ami lo bo no ta pa niun otro hende” i lag’é atras. Durante investigashon polis a haña sanger den baul di e outo i a hasi tèst di DNA ku a resultá di tabata di e dama víktima.
Tantu den korte di promé instansia i korte di apelashon, Juriel a ninga tur e akusashonnan.
El a konta ku el a bai buska e dama fo’i trabou i subi kama drumi.
E no sa nada loke e dama ta papia. Segun e akusado, kisas ta un otro persona ta involukrá.
Durante tratamentu di e kaso, tata di e víktima ku tabata den sala pa representá su yu, tabata hopi kibrá i awa na wowo.
El a bisa ku su yu no por a bin korte e dia ei, pa motibu ku e ta na hospital pa tratamentu ketu bai, relashoná ku e dañonan ku e hinkánan a kousa na su kurpa.
E tata a spliká ku debí na hopi doló, e yu tabata bebe hopi “ pijnstillers”.
Esei a pone ku el a haña un piedra na su gal i awor e mester saka e órgano kompletamente.
Apesar di esaki e akusado a keda bisa ku e ta inosente i no sa nada di e kaso.
El a bisa e ke bai su kas pa e sigui su estudio.
E tribunal di Hof a bisa den e veredikto ku nan a haña e akusado su reakshon hopi friu i sin arepentimentu.
Mirando tur esakinan Hof ta konfirmá e veredikto di korte di promé instansia di 8 aña.