WILLEMSTAD.- 5 di mei 2013 fundadó i lider di Pueblo Soberano i e polítiko mas popular Helmin Magno Wiels a wòrdu kruelmente asesiná na pir di Maripampoen.

Mirando tur e malestar ku Kòrsou ta pasando aden, mas ku nunka Helmin ta hasi hopi falta, esaki segun amigunan di Helmin Magno Wiels.

5 di mei 2021 ta kumpli 8 aña ku Helmin a wòrdu asesiná i  a wòrdu ranká for di nos.

Pero awe mas ku nunka nan ta konvensí ku su vishon i su lucha pa yega na un Kòrsou hustu pa un i tur i kana e ruta pa yega na un  Kòrsou Soberano tin mas peso ku nunka.
Amigunan di Helmin Magno Wiels ta aploudí ku na Sint Maarten i na Sint Eustatius nan a aserká Nashonnan Uní pa trata nos paisnan ku rèspèt i igualdat. Despues di 8 aña ainda nan tin e sentimentu ku te awe nos no ta konformá ku e solushon ku a wòrdu presentá sin un motivashon pakiko mester a asesin’é.

Tin yen di pregunta ku te ainda no a haña kontesta. E grupo tin fe ku un dia e bèrdat lo sali na kla.

Helmin, Papaito, On Wichi, Kabuya…..nos ta sinti bo falta……pero bo ta sigui bibu den nos kurason.
keda trankil, nos ta sigui k’e lucha!

Amigunan di Helmin Magno Wiels.