Tariq de Gouveia a keda mesun humilde awe ku e tabata 8 aña pasá ora el a subi avion pa bai sigui su estudio na Ulanda. Awe sinembargo e tin título di Mr. dilanti di su nòmber. Tariq a terminá 4 estudio den 8 aña ku e tin na Ulanda i el a keda biba den un kamber te awe, for di dia el a pone pia riba Ulanda. Tariq, un hoben masha simpel a konta Djasabra su historia;

Tariq tin 26 aña, nasé na Ulanda i ku 4 aña el a bin Kòrsou bèk ku su mayornan. El a bai tur skol i komo semper e kier a bai bèk Ulanda kaminda el a nase. Ora el a kaba VWO, el a bai Ulanda na 2009. El a kuminsá studia Sport Marketing na nivel di HBO. Tariq ta gusta deporte. Aki na Kòrsou el a hunga basket, baseball i futbòl i na Ulanda e ta hunga futbòl so pasobra no tin muchu tempu. Ku SSC el a yega Ulanda, kaminda el a bai biba ku hendenan ku e no konosé masha. El a hañ’é ta dil ku tur sorto di hende, no solamente ulandes pero yu di Kòrsou tambe. El a logra su promé aña den 2 luna pa e por a sigui mesora ku su di dos aña. Komo Tariq a kaba VWO, e por a bai e estudio HBO Fast Track. Su di dos aña tambe a bai tremendo. El a kuminsá eksperensia kosnan ku e no konosé manera bisti Jas, e mes tin di bai supermerkado, gasta su mes sèn pasobra e tempu ku hende ta paga pa bo a kaba. Su mayornan a prepar’é masha bon, i a pone e mes hasi su kosnan pa e por bai Ulanda. El a siña kushina promé ku el a bai Ulanda i esei a yud’é pasobra e no tabatin mester di bai kome afó. Loke tambe a yuda Tariq ta algun amistat di dje ku tambe a bai e mesun siudat di Rotterdam. El a bai Hogeschool Rotterdam, resultadonan masha bon. Loke si mester dil kuné ta e friu ku no ta manera amigunan a kont’e di dje ora e tabata na Kòrsou. “E promé aña tabata un tèst pa kustumbrá”, Tariq a konta.

Mi no tabatin nesesidat di un studio òf apartamentu.....

Tariq a keda den un kas ku e tabata kompartí ku otro hóbennan. Pero su suerte ta ku nan tur tabata sòru pa un kas limpi. Tariq a keda biba te awe den un kas kaminda e ta kompartí kushina i baño. “Mi no tin problema ku esei. Pa di promé nunka mi tabatin nesesidat di hopi espasio. Mi ta úniko yu i mi mes kamber na kas i pafó mi tabata hunga. Mi no tabatin mester di hopi espasio. Loke mi tabatin mester ta un kamber i sobrá mi no tabatin problema pa kompartí. Ami no tabata ke un studio pasobra mi no tabatin nesesidat di dje. Ademas e no ta sinti ku e por a ‘afford’ esei riba su mes i e no kier a pidi su mayornan i ménos hasi su fiansa mas haltu. Si bo tin nesesidat pa biba bo so mi ta komprondé pero ami no tabatin e nesesidat ei”, Tariq a konta Djasabra.

4 estudio ku solamente beka....

El a bisa di a drei su estudio ku e beka ku e tabata haña, ounke su mayornan a yud’é pa ora e ke hasi algu leuk. Tur su gastu di hür, buki i skol el a paga ku su beka. E no ta un hóben ku ta bisti hopi i ademas kuminda no ta karu. Esun ku mester di mas ku e beka ta pa esun ku ke konosé mas pais i bisti. Den prinsipio Tariq tambe a kai den e tentashon di kumpra kos nobo manera un kèts. Pero el a realisá ku e sèn e tin di pag’é bèk i dikon gast’é siendo e tin kèts den kas. El a realisá ku ta mihó e warda su sèn pa hasi algu leuk. I ora el a spar e promé kos leuk ku el a hasi tabata stazje na Spaña den kuadro di su di tres aña ku e mester a bai stazje. El a bai un kompania na Barcelona pa hasi merkadeo. E kompania mes a sòru pa lugá di keda i transporte pe, 5 dia pa siman. Tariq mester a papia otro idioma ku no tabata ulandes pa e komuniká ku nan na Spaña. Esei tabata e temporada di mas dushi pa Tariq komo studiante i p’esei e ta rekomendá tur studiante ku tin di bai kore stazje pa hasi esaki na un otro pais. Bai siña konosé otro kultura, bo ta eksperensiá kosnan ku bo no ta eksperensiá na Ulanda.

Bachelor rechten...

Despues di 3 aña el a bai pa terminá pero a resultá ku e tabata falta un vak. A ku un dosente a lubidá di hinka un sifra di dje aden. Den su estudio di sport marketing el a haña parti di lei tambe i el a gust’é. Tariq a disidí ku komo e tin di sigui studia e ta bai hasi algu den derechi/lei. Komo e tabatin su VWO e por a bai Universidat. Tariq a laga e vak di HBO habrí pa un ratu i a bai lei, bachelor na Erasmus. Esei a bai diferente ku HBO kaminda bo ta hasi algu hopi huntu pero na universidat ta bo so ku bo so. Den e mesun aña ei a bin ku e sistema nobo na universidat pa prepará e hóben mas pa práktika. Tariq asina a siña konosé mas hende di diferente otro pais. Esei ta mustra un diversidat di hende, siña nan religion. Tariq a logra su tèntamennan ku basta fasilidat i a terminá su bachelor. Na mes momentu el a kaba esun vak ku e tabata falta pa e sport marketing.

Dos Master; strafrecht i commercial and company law....

El a disidí di bai Strafrecht kual e tabata hopi bon den dje. Tariq a gusta loke el a haña pero tòg no asina profundo. Tambe e hendenan ku e tabata kuné, kier a hal esakinan djis pa nan bai traha. Tariq tabat’ei pa e siña. Strafrecht tabata interesante pero el a spera algu otro. “Kabando esei mi a sinti ku henter aña di baina mi a hasi algu. E master tabata ménos intensivo ku e bachelor. Ta djis skucha e dosente papia i despues tèntamen. Bo tin hopi libertat. Mi a disidí di bai buska algu mas ‘challenging’ i semper mi tabata gusta kos di gobièrnu pero nunka mi no a hasi private recht. I mi a bai hasi master  Commercial and Company Law tambe na Erasmus. E tabata ku hendenan internashonal i tabata na ingles”, Tariq a sigui konta.

Tariq awe ta Meester in de Rechten esta Mr. Tariq de Gouveia. “Bo por hunga ròl i broma ku bo sabiduria pero si Dios ke bo ta faya un tèntamen. I p’esei nunka mi a broma ku mi inteligensia i p’esei mi no ta broma ku MR dilanti di mi nòmber. Mi a nase komo Tariq de Gouveia i ta esei mi ta”, asina el a konta nos.

Awor e ta bèk na Ulanda pa buska trabou....

Awor Tariq ta bek na Ulanda pa buska trabou. E no ke traha komo abogado pasobra e no a gusta esei durante di su periodo komo stazje. E ke traha komo konsehero legal na un kompania. Esei ta yuda bo krea un laso ku hende.

Tienda di lei na Rotterdam sùit....

Den su di tres aña na Erasmus Universiteit, Tariq huntu ku 3 amigu a lanta un ‘rechtwinkel’, esta un tienda di lei pa duna konseho hurídiko grátis. Nan a mira ku tur tienda di lei na Ulanda tabata abogadonan ku a lant’e i traha ku studiantenan. Pero den nan kaso nan a lant’e komo studiante, Un hende a duna nan un espasio den Rotterdam sùit. Nan mes ta forma e direktiva di e tienda lei i e ta eksistí ainda. Awor aki e ta presidente di e tienda di lei na Rotterdam sùit. Nan ta yuda hende den bario i ta yuda nan grátis. “Bo ta siña anda ku hende i anda ku kolega den funshon por ehèmpel kon ta dil ku hende ku ta yega lat. Si bo ta stazjèr na un ofisina di abogado bo no por reklamá nan ku nan ta lat pero den direktiva di por reklamá ounke ta trabou boluntario bo ta hasiendo. Lòs for di eksperensia hurídiko bo ta siña anda ku hende bou di bo”, Tariq a konta nos.

Konseho na hóbennan.....

“Sòru pa bo sa kiko bo ke i no mas òf ménos pero sòru pa bo gusta loke bo ta studia. Si bo ta dirigí solamente riba trabou e ta bai robes. Si bo bai traha durante di estudio, sèn ta drenta i estudio ta bai slou. I ora e sèn drenta puntra ta kiko bo ke, ta esei ta loke bo ke hasi. Dia di mi mes mi a ripará ku mi ta gusta deporte p’esei e sport marketing i mi gusta yuda hende i p’esei e lei. E ta duna mi plaser pa yuda hende i hasi e hende kontentu”, Tariq su palabranan na nos hóbennan ku próksimamente lo bai studia.

Kontakto

Tariq de Gouveia

tariqdeg@gmail.com