WILLEMSTAD.- Hues ayera a bai di akuerdo ku e demanda di 8 aña ku Ministerio Públiko a hasi pa Eveldino Evertsz di apénas 20 aña.

Evertsz ta akusá pa 4 atrako den ménos ku 1 siman, poseshon di arma di kandela, mas 2 intento di ladronisia di dos pikòp i tambe destrukshon di e dos glasnan di ámbos vehíkulo.

Ministerio Públiko ta akusá Evertsz  di a kometé e aktonan huntu ku e hóben  R. S. (17)  ku ta un prospekto den baseball i ku ta hunga den selekshon di Kòrsou ku ya a keda kondená.

Evertsz ta keda akusá tambe pa atrako i poseshon di arma.

E promé atrako ku nan ta keda akusá di dje, a tuma lugá dia 19 di òktober aña pasá riba un dama ku ta traha na Curaçao Lottery i ku nan a bai ku 240 florin. Segun e akusashon e hòmber nan a kore drenta e kantor i kometé e  atrako kara tapá. Nan a uza violensia, destrukshon, arma di kandela  dor di pone esaki na kabes di e víktimanan. Den un tono hopi menasante i agresivo nan a pidi e víktima pa duna nan plaka.

Nan ta keda akusá tambe di a kometé e atrako dia 18 di òktober riba un trahadó di kantor di number Joe Black kara tapá uzando arma di kandela i a menasá e víktima.

Pa loke ta trata e di 3 atrako, nan ta keda akusá di a kometé esaki dia  11 di òktober riba dos siudadano i  nan a bai ku su vehíkulo di marka Kia Picanto, un tas di lomba ku tabatin  kámara, brel i pòtmòni ku kontenido, telefòn i zuèmpak.

Nan a hasi esaki dor di kore bai riba e víktimanan i ku un tono menasante nan a pidi e yabinan di outo.

Ámbos ta keda akusá ku dia 11 di òktober nan a kometé un atrako violento na Bullenbaai riba un víktima, di ku nan a bolbe hòrta un Kia Picanto blanku, tas ku tabata kontené 1114 florin, telefòn i un pòtmòni ku kontenido.

Nan a maltratá e trahadó di Joe Black dor di agredié  mas di un bia den su kabes ku arma di kandela, a pone arma na su kabes i di un manera menasante a bai ku e vehíkulo.

Evertsz a atmití 3 atrako ku el a kometé  huntu ku su ko-akusado .

Hues den su veredikto a bisa ayera, ku e hóben R.S. a duna deklarashonnan inkriminatorio, involukrando su mes, bisando entre otro ku despues di atraká e turistanan, Evertsz a dun’e 1000 florin.

P’esei e ta haña e deklarashonnan di R.S. kreibel.

Segun R.S., Evertsz tabata esun ku lo tabata pone bai bah’e pa kometé atrako.

Hues a bisa ku e ta haña tur e akusashonnan probá den su kaso.

Segun hues, normalmente pa tipo di aktonan asin’aki  e kastigu mester ta mas haltu, pero e ta tene kuenta ku e akusado su edat, ku e ta “first offender” i a koperá ku hustisia.

P’esei hues lo no subi su kastigu i ta bai konforme e demanda di 8 aña ku Ministerio Públiko a pidi.