Den un akshon kombiná riba laman e barku di Marina Real Groningen i un tim di Metal Shark di Wardakosta a interseptá un barku di bela ku droga na bordo. E operashon a kuminsá mainta trempan dia 22 di sèptèmber na momentu ku a detektá un barku di bela sospechoso. E barku di Marina Real a detené e barku di bela riba laman i a haña tres paki ku droga na bordo.

Wardakosta i Zr.Ms. Groningen a detektá un ‘go-fast’ ku tabata nabegá na un forma sospechoso. E ‘go-fast’ a nabegá i topa ku un barku di bela i aki ta sospecha ku a hasi un traspaso di kontrabanda. Zr. Ms. Groningen ku tabata nabegá den e área di e barku di bela a dirigí dos di nan botonan di velosidat haltu, e asina yama FRISC’s pa interseptá e barku di bela.

Na yegada e tripulantenan di e FRISC’s a hasi un kontrol riba e boto. Despues di konsultá ku Wardakosta e barku di bela a ser traspasá na un tim di Metal Shark di Wardakosta ku a tou e boto direkshon di Kòrsou. Riba e ruta pa Kòrsou e Metal Shark a risibí asistensia di e cutter Jaguar ku a sigui tou e barku di bela hiba Willemstad. Durante di un kontrol amplio riba e boto a enkontrá tres pakete ku droga na bordo kual tabata kontené mas o ménos 80 kilo di kokaina. E úniko tripulante na bordo tabata un hòmber di nashonalidat Britániko. E hòmber akí i e droga a keda entregá na polis pa kontinuá ku e investigashon.

Wardakosta i Groningen lo kontinuá ku e vigilansia intensivo di e kostanan di e islanan. Banda di Groningen tin tambe militarnan riba kosta ku ta kana patruyá. “Abo komo siudadano alerta tambe por yuda Wardakosta. Na momento kubo mira algu sospechoso riba laman òf na kosta, bo por informá Wardakosta riba e number 913. E number akí ta alkansabel di dia i anochi. Huntu nos por protehá e laman i e awanan di nos isla den temporada di COVID-19.”