WILLEMSTAD.- E hòmber Ingemar Hato (31) mester a presentá dilanti hues pa asumí su responsabilidat. E ta keda akusá di a menasá N. de Lanoi en C. Pieternella dia 8 mei di bula nan ku “handgranaat”.

Segun e deklarashon, e hòmber a presentá dilanti kas di e víktimanan i a grita “Bo yu prostituta a gaña riba mi i e hòmber den e kas ei no mester kuminda mi mas”. “Mi ta bin tira un handgranaat den e kas ei bula boso tur”.

Tambe e ta keda akusá di tabatin un arma di kandela den e periodo di 8 mei 2020  te ku 5 ougùstùs 2020.

Segun e prosèsverbal, e tabatin e arma den su poder durante e periodo 8 di mei 2020 pa 5 di ougùstùs 2020. Ta trata aki di un arma di kandela FN Browing (modelo 1935 Hi Power).

Tambe e ta keda akusá di tabata den poseshon di 22 gram di koka dia 5 ougùstùs último.

Mas aleu Hato ta keda akusá di a para dilanti kas di su víktimanan i tira algun biaha den laira ku un arma di kandela.

Durante tratamentu di e kaso e akusado a pinta un situashon, indikando ku ta e abitantenan di e kas ta molosti’é i ku ta nan ta kousa tur e problemanan.

Hato a ninga redondamente e akusashonnan kontra dje. Fiskal Niks a haña solamente e akusashon di poseshon di arma probá i pa loke ta trata e akusashon di menasa e no a haña ku tabatin sufisiente prueba.

Mirando esaki el a demand’é na 15 luna prizòn di kual 5 kondishonal ku un periodo di prueba di 3 aña, guia di Reclassering i e kurso di Equip di 25 ora (pa trankilis’é).

Hues den su desishon a desviá for di e demanda i a sentensi’é na 9 luna di prizòn di kual 3 kondishonal ku un periodo di prueba di 3 aña. Esei ta nifiká ku Hato pronto lo bai kas.