WILLEMSTAD.- Poseshon, plantashon i humamentu di mariwana ketu bai ta keda prohibí riba nos isla.
Ayera e akusado J.J.(33) tabata den sala di korte, despues ku polis a hañ’é ku un kantidat di 59 gram di mariwana den su skuter.
Riba 17 di mei 2021, polis a pasa den Jo Corsenstraat i a mira un kantidat di hòmber pará huntu. Banda di esaki e agentenan a sinti holó fuerte di mariwana tabata saliendo fo’i e área kaminda e hòmbernan tabata pará. Tambe nan a mira un skuter pará sin plachi number stashoná na e mesun sitio. E agentenan a disidí di para pa tira un kontròl riba arma i droga.
Na momento ku nan a bai listra e skuter, e agentenan a haña un saku ku tabata kontené 90 gram di mariwana. E akusado ku tabata presente ayera den sala di korte, a atmití ku e mariwana tabata di dje pa su propio uso.
Fiskal a haña e akusashon probá i a demandá e akusado na 90 dia di kual 45 kondishonal. Hues den su desishon a haña e akusashon probá i a bai di akuerdo ku e demanda di fiskal i a konden’é na 90 dia kompletamente kondishonal.