Minister: Situashon hospital ta di preokupashon

WILLEMSTAD.-E situashon den hospital Curaçao Medical Center (CMC) ta di preokupashon, asina minister Zita Jesus-Leito a duna di konosé awe mainta durante di e briefing di gobièrnu riba situashon di Covid. Ya kaba ta den kontakto ku islanan ruman i tambe ku Ulanda pa atendé ku e situashon. Un di e maneranan pa sali for di e situashon aki ta di bakuna masalmente. E minister a bisa ku e di tres karga di bakuna a yega Kòrsou.

Entrante mayan djarason 31 mart tur hende ku ta riba lista di funshonnan vital por kuminsá registrá pa bakuna. Nan por registrá i por bakuna for di djasabra 3 i djadumingu 4 di aprel próksimo. Ta trata di e.o kuerpo polisial, wardakosta, téknikonan Aqualectra, Digicel, UTS, trahadonan di supermerkado, shofùr di bus/taksi, lidernan di krèsh, empleadonan imigrashon i vários otro.

E di dos anunsio importante ta ku djaluna 5 di aprel tur persona riba 18 aña ta deseá di risibi e bakuna tambe por traha sita.

Dr. Jerry Semper a enfatisá ku ‘nos ta den problema serio’. Tin 90 hende den hospital pa Covid. Normalmente kuido intensivo tin 16 kama, a amplie ku 30 kama i ya kaba 26 ta okupá. Un bia mas dr. Semper a bisa ku ‘nos ta den un guera kontra di un enemigu invisibel, p’esei nos ta pidiendo 160.000 siudadano pa yuda bringa e guera aki”. E rekomendashon ta pa keda laba man, tene distansia i no aglomerá. Por fabor bakuna, asina Semper a sigui bisa.

E médiko a bisa ku énfasis NO ta bèrdat ku kasonan ta subi pasobra hendenan ta bakuna. E bakuna no ta subiendo sifranan. Mayoria pashènt ku tin awor aki no ta bakuna pasobra mayoria ta entre 40- 60 aña di edat. E yamada ta bai na tur hende den profeshon médiko, esnan ku a baha ku penshun  etc pa yuda pasobra kamanan no ta problema. E situashon ta hopi kritiko, ademas tin sufisiente bakuna pa tur hende. Mundialmente tin skarsedat pero Korsou si tin sufisiente.

Sr. Juliana a splika ku te awe mainta 15755 ya kaba a bakuna. 12000 ta riba 60+. A skohe un sitio nobo i esaki ta SAMBIL. E sentro komersial a pone e espasio disponibel unda por bakuna entre 1000 – 1500 hende pa dia.