WILLEMSTAD.- “Huisartsenpost” (HAP) tin un number di telefòn grátis kaminda por yama pa servisio di e dòkter di warda sin tin mester paga. E number ta 9252, ta loke ku minister enkargá ku salubridat Javier Silvania a indiká.
Dia 1 di yanüari HAP a kuminsá funshoná, kaminda dòkternan di kas no ta traha warda despues di oranan di trabou ni den dianan di fiesta. For di apertura di HAP tabatin basta reklamo relashoná ku e number di telefòn ku mester yama, pasobra e no tabata grátis i asina ta pone ku e sèn ku tin den telefòn, ta kaba un bes. Relashoná ku esaki, gobièrnu a logra di haña un liña di telefòn grátis ku por yama sin e hende su sèn den telefòn ta kaba.
Segun minister Silvania, no ta bèrdat ku na HAP ta 2 pa 3 dòkter di kas tin pa duna kuido na 150.000 habitante.
E minister di salubridat a bisa ku HAP tin 16 dòkter di kas den servisio.
Ta den koperashon ku Curaçaose Huisartsenvereniging, SVB, CMC, GMN. Gobièrnu a lanta fundashon HAP pa duna servisio di dòkter di kas anochi, wikènt i dianan di fiesta. E presupuesto di HAP ta 4 mion pa aña.