WILLEMSTAD.-Awe mainta sindikatonan i sentralnan sindikal di Kòrsou a konmemorá e echo ku ta kumpli 99 aña di un lucha duru ku sindikalista Felix Chacuto q.e.p.d. a hiba na defensa di e klase trahadó di e pais aki. A pone krans na e busto di Chacuto den Otrobanda riba De Rouvilleweg den boka di haf.

Adrie Williams (ABVO) na e okashon aki a splika ku 99 aña pasá Chacuto a inisiá un akshon grandi pa logra mihó kondishonnan laboral pa tur trahadó, spesialmente trahadónan di haf. Chacuto ta un hòmber ku a nabegá i a mira kondishonnan laboral mihó na otro partinan di mundu. El a konsiderá ku trahadónan di Kòrsou tambe meresé esei. E akshon ei a kosta Chacuto hopi pasobra aparte di pèrdè trabou e mester a keda lucha ku kasi nada pa e sobrebibí, sinembargo su lucha tabata unu bon pa logra mihó entrada i rèspèt i dignidat pa posishon di trahadónan. Sindikalismo ta preparando pa e di 100 aniversario di e gran lucha di Felix Chacuto. Mas detaye den edishon di EXTRA.