WILLEMSTAD.- Komishon fiho di Relashonnan Interior di Parlamento hulandes lo debatí djaluna 27 yüni tokante ròl ku Hulanda tabatin den e komersio internashonal di sklabitut. Na nòmber di Kòrsou Gibi Bacilio, presidente di Plataforma Sklabitut i Herensia di Sklabitut, lo partisipá na e konferensia di mesa rondó. Tambe èks-minister presidente Suzy Camelia-Römer, na nòmber di Kòrsou, Aruba, St. Maarten, Boneiru, St. Eustatius i Saba lo partisipá den e konferensia.
Bacilio, den un entrevista ku EXTRA, a splika ku e ta kontentu ku e islanan por partisipá den e konferensia di mesa rondó. Segun Bacilio tin diferente rapòrt riba mesa i el a manda resientemente 12 diferente rekomendashon na Hulanda den un karta pa komishon fiho di Relashonnan Interior di Parlamento di Hulanda.
Pa Bacilio tin tres kos hopi importante: “Hulanda tin ku pidi despensa pa e ròl grandi ku nan tabatin den komersio di sklabitut. Un despensa hopi sinsero ku por yuda nos den e lucha. Tambe nos ke ku Hulanda ta reakshoná riba un petishon pa rehabilitá Tula.” Te ainda Hulanda no a reakshoná riba un petishon pa esaki, ku e Plataforma a manda aña 2019 na gobièrnu i Parlamento. Segun Bacilio ta importante ku ‘Tula por sirbi komo ehèmpel pa nos, komo fuente di inspirashon pa kontinuá ku e lucha pa mas i mas emansipashon’. Gobièrnu di Kòrsou riba 17 ougùstùs 2010 ofisialmente a rehabilitá i proklamá Tula komo héroe nashonal. Esaki a keda rekonfirmá pa gobièrnu di Rhuggenaath na ougùstùs 2017. Pero pa Hulanda te ainda Tula ta un kriminal. Bacilio: “Nos ta pidi rehabilitashon for di Hulanda. Preferibel un rehabilitashon for di boka di Rei Willem-Alexander i minister-presidente Mark Rutte,”
Bacilio ta konsiderá konferensia di mesa rondó di djaluna awor komo un paso importante ‘den nos lucha pa yega na rehabilitashon pa Tula’.
Un otro punto importante ta reparashon kolonial. Ta intenshon di Plataforma ku Hulanda lo duna sèn pa proyektonan di formashon i edukashon pa pueblo di Kòrsou. Segun Bacilio tempu di sklabitut te ainda tin su efektonan negativo den nos komunidat.
PORTRET
…Gibi Bacilio, presidente di Plataforma Sklabitut i Herensia di Sklabitut…
