Eksposishon di obranan koba den palu i mas

Dia 20 di òktober ta bai tin un eksposishon di obranan ku Marina Kirindongo Dahlia’s Art & Creations di ta trese.  Dahlia ta un flor ta nèt pa ora bo ke kuminsá ku algu nobo den bo bida i esei ta e flor ku ta regalá e hende. Den kasi di Marina e Dahlia ta nifiká pa trese un kapítulo nobo den bida. Kada kos ku Marina traha na úniko, ta un so di dje i kada bes e ta trese algu nobo. Kada un di su obranan ta apart i úniko. E eksposishon ta tuma lugá den marshe nobo parti ariba.

Pèrdè trabou i oportunidat nobo

Marina a konta nos ku e ta un persona ku semper a gusta obra di man. Esaki for di skol básiko el a skor bon punto pe. Segun trayektoria di su bida, su yu muhé ku tambe ta bin ku kosnan di skol i  e ta yud’é i loke  a pone bai den arte mas profundo ta ku na 2018 el a haña karta di retiro. For di prinsipio el a pensa ku e ke algu èkstra huntu ku su trabou i tur hende semper a bis’é ku e tin obra i dikon no arte. E tabata preparando pero nunka a pensa ku e lo a bai mas profundo den dje. E ta algu di su bida, di su trabou pasobra for di dje e tin di biba. Den transkurso di esun aña ku el a haña su karta di retiro di 2018 pa 2019 el a kuminsá prepará. Marina ya tabata traha kashi i muebel pa su mes kas. E ta gusta ta besig, e gusta hasi kos ku su mannan. Marina ta haña su mes komo un persona úniko pasobra asta su pañanan e mes ta skohe. I asina e kier a traha algu pa hende tin algu apart den su kas. E ke pa tin algu ku ta un so tin i asina su arte a nase.

Traha tur kos

Marina ta konsiente ku e mes ta traha tur kos. E no a bai niun kurso pero probablemente e tin e don. E ta sinta wak e kos, e ta pint’é i trahe. Tin bia e ta konsultá ku YouTube i ta haña idea di kosnan ku e ke kita i pone i yega na su mes kos. Semper Marina ta wak, focus, studia e kos, e ta pensa kiko e por kambia i asina purb’é. Semper te ainda a salié di bon.

Koba den beteonplex

Pa loke ta su obranan, esakinan ta di palu. Marina a konta Djasabra ku e ta gusta hasi opservashon. E ta bishitá diferente lugá ku ta bende arte òf eksponé i e ta kana wak rònt. E kier  a hasi algu ku no ta loke tin aktualmente kaba. I e ta sinta i pinta i ta yega na loke e ke. E ta pint’é, despues ta hasié mas grandi ta usa betonplex pa e hinka forma den dje. E parti plat ta e betonplex i kaminda tin e volúmen ta e dòbel di e betonplex e ta bira. Marina ta kuminsá duna forma na man, despues ta bai riba mashin spesial i despues sigui na man i termin’é pa e ta mas fini posibel. Kada obra ta tum’é algun dia pa e por yega na dje. Kada proyekto di dje tin nan paso pa e yega na e final, 4 dia largu e ta tuma pa e yega na e parti di e formashon di e proyekto. I e ta tuma tambe algu ora pa e dun’é koló. Kada proyekto di dje ta tuma sigur un siman pa e hink’é den otro.

Resiklá tambe

El a sigui konta nos ku e ta focus riba un tema por ehèmpel si ta laman, e ta kue un piská, un kokolishi, e mata di laman, pida di kada kos di e tema i asina ta form’é. I no ta solamente palu so Marina ta usa pero tambe otro material manera semènt. El a mustra nos un vas traha di semènt. E ta resiklá hopi, por ehèmpel e ta usa karton ku hende ta benta afó, pa e duna forma.

Di tres eksposishon

Esaki ta e di tres eksposishon di Marina. El a bisa ku aña  pasá tambe e tabatin otro eksposishon. I kada un di su eksposishonnan e tin kosnan nobo. Di 2018 ku el a bai dediká su mes na su obranan, e kosnan a kaba basta lihé. E tin obranan chikí for di 20 centimeter te esun di mas grandi ku ta vasnan grandi di 50 centimeter di haltu.

Uniko

El a pone énfasis ku niun di su obranan ta mesun kos. Si un hende wak un obra i si e ta bende kaba i ke u meskos e por trahe pero e ta bin tòg diferente. E ke pa su kosnan keda úniko. Di e forma ei hende tin mas konfiansa pasobra e hende sa ku loke e tin ei ta su so tin e di Dahlia.

Posibilidat pa paga poko poko

Arte no ta barata i hende no ta kumpra fásil ounke e interes tei si. I p’esei e tin e posibilidat ku si e hende ta deseá di kumpra, e ta konsehá nan pa kumpr’é i yega na un areglo di pago. Obranan di arte ta kosta hopi tempu, hopi trabou i hende no ta mira e esfuerso i tempu ku e artista ta hinka den su obranan. Marina ta hasi su kosnan ku hopi amor i pashon. Promé e traha su obranan e ta hasi orashon pa e tin e forsa, pa e su mannan keda bendishoná. I p’esei loke e bende ta un bendishon e hende ku kumpr’é ta bai kuné.

Mas di 150 obra

For di dia ku el a kuminsá ku su obranan el a yega mas di 150 arte traha. I esei ta kosnan ku el a bende kaba. Su negoshi Dahlia Art & Creations no tin un lugá figo pero den marshe nobo parti ariba el a hür un espasio pa pone su obranan. El a komprondé ku ta bai hinka mas artista den plasa ariba. E ta un di e promé nan ku ta kuminsá. Hopi bia hende ta kana abou so den e marshe i no ta bai ariba  p’esei ke bin ku obranan pa trese e hende parti ariba tambe. I pa esun ku ke tuma kontakto kuné por app na (599) 9 5156912. I tambe e tin posibilidat di mas ku su eksposishonnan na kas di hende. Ta djis forma un grupo, skohe su obranan i e ta bai kas ku nan. E sa ku riba potrèt bo no ta haña un bon idea ku mira e obra personal. P’esei Marina ta invitá tur hende pa bin wak e obranan.

Pe artista ‘starter’ ta poko difísil

Ta poko difísil si pa biba di arte so, prinsipalmente na Kòrsou. Esaki pasobra segun Marina pa yega na e persona i prinsipalmente ora ke hasi propaganda, mester invertí masha hopi. Un hende no ta mira bu praktikamente i prinsipalmente e ku a kuminsá ku ainda su nòmber no ta asina konosí. E artista ku ta konosí kaba si ta bai mas fásil i no tin mester di masha propaganda. Pa un ‘starter’ ta poko difísil pa hende rekonosé nan obranan.

Eksportá

Tambe el a pensa den eksportá su obranan. Esei ta Marina su deseo. E ta spera algun dia e yega asina leu ku e por eksportá su obranan i asta organisá un eksposishon na otro pais. Tin hopi artista na Kòrsou i ta últimamente nan ta saliendo tiki tiki. Ora e mira tur esnan ku ta saliendo por bisa ku tin artista na Kòrsou i tin e nobonan ku ta yama afó pa bin pero tin no tin e manera pa yega. Hopi no sa kon pa yega pa haña e propaganda nesesario.

Dia 20 di òktober e eksposishon ta start 10 or di mainta te 2 or di mèrdia. Dependé kon e fluho ta kisas por bai un tiki mas. E eksposishon ta na Marshe nobo parti ariba.