Fiansa a prevení bankarota

WILLEMSTAD - Ta refinansiá e fiansa di un total di mas ku un bion euro ku Hulanda a ofresé Aruba, Kòrsou i Sint Maarten komo sosten di emergensia durante di e pandemia di Corona i e ta keda sin interes. Konseho di Minister di Reino a disidí esaki awe.

Hulanda a ofresé sosten na e paisnan den Reino durante di e pandemia. Entre otro riba tereno di kuido médiko pero tambe sosten finansiero. A fia 441,7 mion euro (915,5 mion florin arubano) na Aruba, 449,2 mion euro (911 mion florin antiano) a bai pa Kòrsou, miéntras ku Sint Maarten a risibí 141,7 mion euro (292,4 mion florin antiano).

E fiansanan sin interes tabata nesesario pa e paisnan por a sigui paga nan debe durante di e pandemia i supsidiá kosto salarial di e industria di komersio. Asina a prevení bankarota i desempleo ora ku turismo a kai afó komo konsekuensia di Corona.

E fiansanan di likides aki ta kore te ku 10 di aprel 2022. E situashon ekonómiko finansiero ainda no a rekuperá sufisiente pa e pagamentu bèk ta posibel. P’esei a disidí pa prolongá e fiansanan sin interes ku 18 luna. E intenshon ta pa usa e tempu aki pa hasi palabrashonnan di tempu largu tokante e pagamentu bèk.

Aparte di esei, a diskutí durante di Konseho di Minister di Reino ku pa e di dos kuartal, e paisnan no tin mester di sosten di likides.