WILLEMSTAD – Awe mainta alrededor di 06.20 or, Reshèrshi konhuntamente ku Tim di mantenshon di òrdu públiko a detené un sospechoso mas na un kas den Roosendaalweg, relashoná ku e kaso di asesinato na Penstraat, kual a tuma lugá dia 5 di febrüari último.

Ta trata di e hòmber, R.R.R. di 68 aña di edat, nasé na Kòrsou. Riba e fecha ei den un forma kruel i sin rèspèt pa kas di hende, e siudadano Gerald Nicolina konosí komo Chado di Penstraat ta keda likidá den su kamber di kas. For di investigashon preliminar realisá pa polis na e sitio, ta sali na kla ku dos hòmber a yega na e kas en kuestion den un outo i baha bai paden. Una bes paden, un di nan a pone pistol na kabes di un habitante miéntras ku e otro a pasa bai den kamber i lòs algun tiru dirigí riba su víktima, ku konsekuensia fatal.

Durante investigashon na e kas menshoná, Polis a konfiská un outo i algun dokumento ku ta importante pa e investigashon.

A presentá e sospechoso R.R.R. sospechá di komplisidat den e kaso di asesinato menshoná dilanti un fiskal ouksiliar ku a ordená su enkarselashon pendiente mas investigashon.

Anteriormente ya kaba a detené e sospechosonan S.J.E.M (25) i M.M.V. (20) i riba 17 di febrüari último tambe a detené un di tres sospechoso, e hòmber S.M.A.C. nasé na Kòrsou di 36 aña di edat. Total tin kuater detenshon den e kaso aki.

E investigashon den e kaso aki ta kontinuá.