WILLEMSTAD.- Marechaussee na Hulanda djárason último na Schiphol a arestá un hòmber di 58 aña. E persona a sali Kòrsou djamars último. Na bordo di e avion el a kousa hopi problema. Segun Marechaussee e hòmber a perturbá òrdu den avion. Pa kolmo despues di su aresto a sali na kla ku e persona tin un sentensia di sinku aña habrí na Bèlgika pa motibu di un delito di droga.
Marechaussee a duna di konosé ku djamars último nan a haña informashon ku un pasahero tabata hopi agresivo den e avion ku a sali for di Kòrsou.
E persona tabata enbolbí den un pelea ku un otro pasahero i pa kolmo e no a sigui òrdu di personal di e aerolínea. Na un dado momento piloto a disidí pa no sigui bula pa Hulanda mas, pero pa buska un otro destinashon mas serka pa baha. Na final tòg a opta pa bai Amsterdam. Aya Marechaussee a arestá e persona.
E kompania di aviashon a entregá keho kontra e hòmber pa motibu ku el a pone bida di otro hende na peliger durante e buelo. Banda di esei e persona lo wòrdu pasá na Bèlgika pa su sentensia ku e tin habrí.