WILLEMSTAD.- Mr. Quincy Girigorie ta riba kaminda pa sera e kapítulo ministerial ku el a enkabesá durante kuater aña. Esei ta bira konkreto na momentu ku e gobièrnu nobo tuma asiento. Historia di último dos dékada a demonstrá ku e kartera di Hustisia no ta esun di mas fásil. Pero no opstante esei sr. Girigorie durante e kuater añanan aki tabatin logro. Den un entrevista ku EXTRA e siman aki el a duna di konosé entre otro ku kuater aña pasá el a ser aserká dor di sr. Eugene Rhuggenaath pa e asumí e funshon, partikularmente pa motibu ku e tin un spesialisashon riba tereno di resosialisashon. Manera ta konosí, promé ku el a bira e titular di hustisia sr. Girigorie a dediká su karera komo abogado, prinsipalmente den kasonan penal.

El a splika ku, semper e loke komunidat ta usa komo midí pa éksito di un minister di hustisia, ta na e seguridat di pais. Promé ku e asumí e responsabilidat tabatin un plan di maneho i el a kontinuá ku esaki ku e meta pa baha krímen en general ku por lo ménos 25%. I finalmente esei a ser lográ. I e ta kere ku esei ta e logro di mas importante ku e tabatin komo minister.

Pero den e mesun rosea e tin di rekonosé ku huntu ku bahada di krímen mester konsiderá tambe e sentido di seguridat. I esei ta un dje temanan ku e próksimo gobièrnu tambe tin komo punto di lansa, i esei na su opinion ta un aserkamentu korekto. E tin di rekonosé ku, apesar ku gobièrnu por ta bahando aktividatnan kriminal en general di forma ophetivo, esei no nesesariamente ta nifiká ku e sentido di seguridat a subi. Pero sei tin un tiki di haber kon e aparato hudisial mes ta funshoná, e komunikashon, e servisio etc.

Resosialisashon:

Resosialisashon tambe ta un aspekto importante ku el a traha semper riba dje huntu ku prevenshon. Mester rekordá ku e último añanan Prizòn/SDKK a gana premionan pa inovashon pa loke ta trata e proyektonan di resosialisashon.

Den prizòn tin detenidonan ku tin nan propio negoshi, tin hopi ku sa kon pa gana nan pan di kada dia, tin detenido ku a haña sentensia di bida largu, pero ku awe ta altamente kapasitá i diplomá pa traha den e sektor di konstrukshon.

Ta importante pa esnan ku ta será por bai bèk den komunidat ku un perspektiva nobo. A apuntá asta un trahadó di Reclassering pa keda enkargá ku e aspekto di formashon. Pues debidamente ta traha riba e parti di formashon di detenidonan. Pues resosialisashon den prizòn tambe e ta mira komo logro dje último kuater añanan.

Den nos edishonnan di otro siman nos lo amplia riba e diferente temanan ku nos a trata ku e minister ku aktualmente tin un status demishonario.