FLOW ta asta doño di kabelnan supmarino

WILLEMSTAD.-No muchu dia pasá Bureau Telecommunicatie & Post (BTP) a informá komunidat ku nan no tin niun grep riba servisio di internèt ku kompanianan ta brinda komunidat. E reklamonan riba kalidat di internèt ta sigui krese tur dia den komunidat. Tin diferente kaso di hendenan ku ta keda sin internèt pa algun siman, miéntras ku nan si ta kumpli i paga pa e servisio tur luna. BTP a informá anteriormente ku nan a tuma e inisiativa di traha riba un konsepto di lei pa asina por regulá e kalidat di internèt i otro servisionan ku kompanianan di telekomunikashon mester brinda. E realidat ta ku un kliente ta paga pa risibí sierto kanalnan di televishon, e kompania ta saka e kanalnan ei afó sin niun notifikashon na e kliente i e kliente no por akudí niun kaminda pa su derecho.

Den deklarashon na EXTRA e direktor general di BTP Franklin Sluis a indiká ku nan no tin niun outoridat pa yega serka e kompanianan i reklamá ku e kalidat ta malu, simplemente pasobra esaki no ta ankrá den lei. Ta pa e motibunan ei ku BTP a traha riba un konsepto di lei i entrega esaki na Parlamento.  BTP mes a nota ku ora midi e speed di internèt den dia e ta leu for di loke kliente ta paga pe, miéntras ku ora ku midi e speed den mardugá por nota ku e ta mas serka di loke kliente ta paga pe. Ku otro palabra den mardugá tampoko e speed no ta loke e mester ta, e ta mas serka di loke e mester ta!

Awor aki ta asina ku FLOW ku a kumpra UTS ta asta doño di kabelnan bou di laman. Ta kabelnan sumamente importante ku ta hasi Kòrsou un pais bon pa komunikashon internashonal. E direktor di BTP ta kere ku mester bin kompetensia amplio riba infrastruktura di internèt i kabel supmarino. Nan a hasi nan parti, di entrega un proposishon di lei, ban wak si Parlamento, minister i hinter gobièrnu lo duna atenshon na esaki.