WILLEMSTAD.- Si tin algun medio ku Landsrecherche Curacao (LrC) tin hopi falta di dje, anto ta medionan finansiero i material pa por operá na e nivel ku ta spera di dje. Esei di akuerdo ku un investigashon ku Raad voor de Rechtshandhaving a hasi algun tempu pasá. Segun e relato, LrC mester por dispone di sufisiente medio finansiero pa por ehersé su tarea, i tambe e tin mester di sufisiente medionan material adekuá manera e.o. vehíkulo, aparatonan di intersepshon i aparatonan digital pa investigashon riba sistemanan komputarisá i material di imágen.

For di e investigashon aki a bin sali na kla ku e falta di medionan (finansiero) kada bes a bira mas pèrtá. LrC ta ripará un tendensia den kual e medionan ta birando mas skars, miéntras ku di otro banda mas i mas ta pidiendo un prestashon i produkto (investigashon) di kalidat haltu. Esaki ta algu ku hopi dje funshonarionan ta konfirmá.

Komo ehèmpel konseho ta mustra riba e echo ku e último añanan a kòrta den e presupuesto pa estudio i training. Banda di esei, LrC no ta disponé di un pòst for di kual lo por kubri gastunan di kualke investigashon. Mas aleu e último añanan a bin kòrta tambe den e pòst di kostonan di transporte, biahe i estadia, i esaki ku sigur un 58%. Pero e deseo di LrC ta pa e por manehá su propio presupuesto, i por bisa ku Ministerio di Hustisia ta sostené LrC den e deseo ei. Por sierto, e maneho propio di asuntunan finansiero ta menshoná den e konsepto di lei pa LrC.

Den e investigashon aki a konstatá ku lo mester a kumpra aparatonan digital pa instalá den e kambernan pa skucha kòmbersashon. Te na 2016 numa a bin instalá aparatonan oudiovisual pa graba den e kambernan en kuestion.. Pa medio di e aparatonan aki pa sigui interogashonnan ku ta ser hasí na distansia, pa asina por duna indikashon na reshèrshinan durante e interogashon.

Pa motibu dje gastunan haltu, LrC ainda no ta disponé di su propio aparato pa interseptá kòmbersashon. P’esei a skohe pa konhuntamente kumpra i usa aparatonan di intersepshon den mayoria di pais den Reino. Por bisa ku LrC ta disponé di sufisiente vehíkulo si.

Mas aleu tambe den otro nesesidat material manera kòmpiuter tin sufisiente. Pero tòg no por bisa ku LrC tin material adekuá pa traha kuné. Ta hasi uso di e medionan skars ku tin pa traha. Dor ku no tin sufisiente medio finansiero, tin hopi kos ku ta kana slo i difísil.

Pero kaminda esei ta posibel, LrC ta fia aparatonan di RST. I den kaso ku RST mes tin mester di su aparatonan, LrC tin di warda te ora ku RST por dun’é un man.