Un ratu pasá a firma final draft

WILLEMSTAD.-Informashon ku EXTRA ta dispone di dje ta indiká ku un ratu pasá a pone firma bou di un ‘final draft’ di e akuerdo entre e grupo CORC i Refineria di Kòrsou (RdK) ku ta doño di e terenonan i instalashonnan di refineria. Ta bon pa enfatisá ku esaki no ta e final, es mas despues ku a firma e ‘final draft’ di e akuerdo awe RdK mester trata e akuerdo aki den seno di su hunta di komisario i despues mester trata esaki den Konseho di Minister. Ora ku Konseho di Minister ta kla por pasa un akta na notario den kua ta seya e akuerdo.

EXTRA a chek mesora si e akuerdo aki ta algu ku e gabinete saliente por firma konsiderando ku nan ta demishonario i ekspertonan a splika ku esaki sigur ta un ‘lopende zaak’ i komo tal e gobièrnu saliente por pone su firma bou di dje. E akuerdo ku a firma aki ta nifiká no tin buèlta atras, pues e negosiashonnan a yega di tal índole ku mester sigui i finalisá esakinan pa e refineria na Kòrsou por kuminsá operá atrobe. Riba e pregunta kon a para ku e diferente puntonan di diskushon ku tabatin entre RdK i e tim di CORC EXTRA a haña splikashon ku a atendé ku e puntonan aki kaba. Asta ta asina un a splika ku e gobièrnu ta bai tuma rienda di e pais aki dentro di poko tambe a mustra ku RdK ta haña dos siman pa konkretisá akuerdonan si no ora  gobièrnu nobo drenta nan mes lo tuma e enkargo total.

Ta hasiendo tur esfuerso pa konkretisá tur akuerdo di manera ku pa mas tardá sèptèmber e refineria ta operashonal. Di otro banda RdK ya kaba a anunsiá ku e kontrakt ku e trahadónan ku nan a tuma den servisio d CRU ta kaba na yüni próksimo i pa esei ta importante pa keda kla promé ku yüli kuminsá. Prosesamentu di 6 mion bari di krudo lo tin un impakto grandi riba divisa i ekonomia di Kòrsou. Un akuerdo final entre RdK i CORC mester dura por lo ménos 25 aña, den e kuadro ei ta importante pa gobièrnunan benidero kuminsá prepará pa futuro, desaroyando otro pilánan ekonómiko.

Di parti EXTRA tur klase di éksito pa konkretisá e proyekto grandi i importante aki pa Kòrsou.