A desvelá buki ‘Curaçao, My lasting love affair’ di fotógrafo Bea Moedt

WILLEMSTAD.- Fotógrafo Bea Moedt djamars mainta tabata presente na desvelo ofishal di su buki ‘Curaçao, My lasting love affair’ na Landhuis Bloemhof. Propósito di produkshon di e buki ta pa generá fondo pa Fundashon Hospice Arco Cavent, kaminda personanan ku ta sufri di malesa terminal i no ke òf por biba na kas durante e último fase di nan bida, por haña kuido i atenshon den un esfera doméstiko.
Bea Moedt ya pa algun aña ta sufri di malesa di pulmon i e último añanan tambe ta sufri di kanser di pulmon. Aktualmente Bea Moedt ta permanesé na Hospice Arco Cavent. Bibando na e hospice e la realisá ku mester di fondo pa mas persona por haña akseso na un hospice. Inisialmente e la kuminsá duna sosten pa medio di un crowd-funding p’asina rekoudá fondo pa e hospice. Despues Bea Moedt a tuma e paso pa produsí un buki ku e potrètnan mas impreshonante ku e la yega di saka di eksperensianan na Kòrsou for di e ángulo ku ta típiko pa e fotógrafo premiá lokal i internashonalmente. E buki ta su manera pa gradisí Kòrsou, ku e ta yama su kas for di 1993, i henter komunidat pa e echo ku e por a kapturá ku su kámara momentunan i eksperensianan úniko ku bida na Kòrsou ta ofresé.
E montante ku lo rekoudá for di benta di e buki lo ofresé na Hospice Arco Cavent. Djamars mainta e parti ofishal a tuma lugá ku diskurso di representante di hunta di Stichting Bea Moedt, Annemiek van Rooij, i ku direktora di Fundashon Hospice Arco Cavent, Rianne van Gestel. Tambe tabatin un presentashon di un video ku Elodie Heloise a traha huntu ku Dick Drayer. Den e video Elodie Heloise ta entrevista Bea Moedt tokante e buki. Den e entrevista e fotógrafo renombrá ta bisa ku e ta hopi felis ku e kuido ku e ta haña den Hospice Arco Covent. “Tur trahadónan ta stima e hende ku ta permanesé. E ta algu hopi speshal.” Moedt durante su estadia a komprendé ku Hospice Arco Cavent no ta haña sufisiente sèn for di SVB pa duna e kuido. “SVB ta paga 85 Naf pa persona pa dia, esaki no ta sufisiente. Ora mi a tende esaki, mi a lansa e idea pa produsí un buki ku mi portrètnan mas bunita. Tur e sèn di benta ta bai Hospice Arco Cavent. Esaki ta mi manera pa hasi algu bek na e trahadónan i e hospice, ku na mi opinion ta super speshal.”
El a splika ku e ta den e último fase den su bida. “Pero te ainda mi tin forsa, ku ta nifiká ku mi lo sigui traha. I sigui yuda hende.”
Te ainda diferente kompania i persona a duna di konosé ku nan ke kumpra ehemplar di e buki. Algun di nan (entre otro Blue Bay) lo kumpra e buki den kantidat hopi grandi. Tambe hende a inskribí riba e buki. Te ainda un kantidat limitá di bukinan a yega Kòrsou. Stichting Bea Moedt, ku ta responsabel pa produkshon di e buki, ta spera ku otro siman un kantidat grandi di e buki spesial lo yega Kòrsou.