WILLEMSTAD - Djamars 4 di òktober 2022, alrededor di 00:13’or, sentral di Polis a dirigí un unidat na un snek na Seru Fortunaweg pa un atrako ku a kaba di tumá lugá.

Mesora a dirigí un unidat di polis pa e sitio i na nan yegada a hasi un investigashon.

For di e investigashon preliminar a sali na kla ku 5 hòmber arma mester a baha for di un vehíkulo i a atraká e bishitante nan.

Despues sentral di polis a dirigí e unidat pa asistí un kolega di atrako tim ku a señala e vehíkulo sospechoso na un establesimentu riba F.D. Rooseveltweg.

Na yegada di e unidat a hasi detenshon alrededor di 02:40’or di e hòmber sospechoso L.A.W. nase na Hulanda di 24 aña di edat.

E ko-sospechoso nan no a duna oido na e òrdu di polis i a hui bai den e vehíkulo for di e sitio.

Despues a sigui un persekushon i a bin detené alrededor 02:50’or un otro hòmber sospechoso L.L.W. nase na Hulanda di 21 aña di edat, na altura di e pòmp di gasolin na Juan Domingu.

A konfiská un vehíkulo i artíkulonan di suma importansia pa e investigashon

Un di tres sospechoso ku tabata den e vehíkulo a logra hui i bai laga polis.

A presentá e dos sospechoso nan dilanti di un fiskal ouksiliar ku a ordená nan enkarselamentu pendiente di mas investigashon.